Txistu y Tamboliñ

Barraskiloaren erabakia

Txistu y Tamboliñ | 2024-09-03 15:47

Egun baten, barraskiloak erabaki zuen aurrerantzean arinago ibiliko zela. Okerreko erabakia izan zen: errepideak erbien gorpuzkiz beterik egoten dira. Bernardo Kapanaga

Tatuajea

Txistu y Tamboliñ | 2024-08-25 12:14

Tatuaje bat egin dut, aurrerantzean inpunitate osoz bizitzeko: hatzetan erregearen hatz-markak tatuatu ditut. Bernardo Kapanaga

Iruzurra

Txistu y Tamboliñ | 2024-08-09 11:33

Bolari begira, etorkizun iragarleak bizitza luzea iragarri zion. Saioa amaituta, iragarleak bere zerbitzuen zenbatekoa esan zion. Bezeroa zeken hutsa zen, eta lapurreta iruditu zitzaion. Aulkitik altxatu eta, haserre-plantak eginez, zera esan zion: -Ez duzu nire etorkizuna asmatu eta orain kobratu nahi didazu? Ez dut iruzur hau onartuko! -Jauna, bolan argi eta garbi ikusi dut... Iragarleak ez zuen esaldia amaitu: bezeroa jakatik pistola bat ateratzen ikusi zuen. -Koplak! Ni ez nauzu engainatuko! Eta bolak zioena gezurtatzeko, tiroa eman zion bere buruari.  Bernardo Kapanaga

Puigdemont

Txistu y Tamboliñ | 2024-08-08 11:51

Eskapismoaren maisu Anthony Martin Bartzelonan dago. Bere dizipulu bat bisitatzera etorri da: Carles Puigdemont. Poliziak Puigdemont atxilotzeko agindua du, eta hiria kontrolez bete du. Maisuaren aholkuak jarraituta, Puigdemont jendaurrean agertu da, diskurtsoa eman du eta eszenatokian dagoen kutxa batean sartu da. Polizia bertara agertu da eta kutxa zabaldu du. Barruan Anthony Martin aurkitu dute: Puigdemonten arrastorik ez, ordea. Poliziek Anthony Martinen praketako poltsikoak arakatu dituzte eta giltza bat topatu dute. -Nongoa da? -galdetu diote. -Modelo presondegiko ziega batekoa. ...

Colónen itzulera

Txistu y Tamboliñ | 2024-06-26 17:41

Bueltatu da Colón bidaiatik, eta errege-erreginaren jauregira joan da. -Eta? Aurkitu duzu mendebaldeko bidea Indietara joateko? -Ez. Baina beste lurralde bat deskubritu dut. -Tira, bada zerbait. Horrela, Espainietako lurraldea itsasoz bestaldera zabalduko dugu. -Tamalez, ez gara lehenak hara iristen. Lurralde hura populatua dago, eta jabeak ditu. -Konkistatu beharko dugu beraz. -Hori ezinezkoa izango da. -Zer ba? -Hara heldu ginenean, bertara lanera joateko baimena eskatu ziguten. Jakina, guk ez genuen horrelakorik. Orduan, esan ziguten joakin ilegalak ginela eta ez genuela e...

Antzindari

Txistu y Tamboliñ | 2024-06-15 14:06

Antzinako ideiak defendatzen dituen sasiaitzindaria. Egungo politikari asko, aitzindari plantak egin arren, antzindari petoak dira.

Benetako infernua

Txistu y Tamboliñ | 2024-06-09 20:26

Hildakoan, infernuan itzartu nintzen. Ezustekoa izan zen niretzat, sinesgabea bainintzen.  -Zer egiten duk hemen? -galdetu zidan Txerrenek ikusi ninduenean -Gaiztoegia izan haiz bizitzan. Hik benetako infernua merezi duk! Eta bueltan bidali ninduen mundura. Bernardo Kapanaga

Mailu bat poesia da

Txistu y Tamboliñ | 2024-06-07 17:37

(Tirano eta genozidentzat) Mailu bat poesia da baldin eta buru egokia jotzen badu. Ez da behar epopeia luzerik, nahikoa da kolpe zehatz bat: buruhauste batek buruhauste asko konpon ditzake. Ron Sniakin

Odol gorria

Txistu y Tamboliñ | 2024-05-30 17:18

Aita hilda, printzeak haren lekua hartu zuen. Koroatze-ekitaldian, errege berriak zur eta lur utzi zituen guztiak. -Uko egiten diot koroari. Izan ere, ni errepublikazalea naiz. Monarkiaren itzalean goxo-goxo bizi ziren bizkarroiak arriskuan ikusi zituzten euren bizkarrak. Zerbait egin behar zuten erregearen hordago hari erantzuteko. Istriputxo batek eman zien aitzakia euren bizkarrak besaulkien erosotasunean iraunarazteko: erregeak zauritxo bat egin zuen atzamar batean, eta hara!, atzamarretik odola atera zitzaion. -Odol gorria du! -egin zuten oihu bizkarroiek- Horregatik da errepublika...

Robota

Txistu y Tamboliñ | 2024-05-27 15:45

Aita hil zenean, amak robot bat erosi zigun, aitaordearena egin zezan. Robota etxetik irten eta oraindik ez da bueltatu. Zinez esan behar dut ez dugula aitaren falta igarri: robota haren erreplika perfektua da.    Bernardo Kapanaga