Nork jarri du publizitatea nire blogean?

Gaur blogera sartzean gauza berri bat aurkitu dut The Indezents honen alboko zutabean;  publizitatea. Nik dakidala ez diot inori baimenik eman nire blogean iragarkirik jartzeko baina hala ere hor daude. Nahiko lan hartu du lagun batek blogaren itxura hobetzeko orain iragarki txungo batzuk hortik zehar izateko.

Ideia norena izan den galdetzen hasi naiz nire buruari eta blogak.com-eko beste blog batzuetan sartu naiz. Denetan gauza bera ikusi dut, blogaren erabilgarritasuna oztopatzen duen publizitatea. Gauzak horrela, erabakia blogak.com berarena izan dela pentsatzen hasi beharko naiz.

Egia esan, ez zait batere gustatu blogean aurkitu dudana. Hasteko, denok dugu aukera gure kabuz (eta dirua guretzat izanda) blogean iragarkiak jartzeko eta ez badugu egin zerbaitegatik izago da ezta? Nik behintzat ez dut publizitaterik nahi nirean eta horrexegatik gustatzen zitzaidan, beste gauza batzuen artean, Internetek ematen duen askatasuna.

Hala ere, eta inorekin sartzen hasi aurretik (erraztasun handia dut horretarako) blogak.com-ek dirua behar duela pentsatzen hasia naiz (hala bada, ez dut uste gure blogekin ezer konponduko dutenik) baina hala bada ere, blogen arduradunei (ez zait blogari hitza gustatzen) egin behar zutenaren berri eman behar zieten, gutxienez.