Piano baten gainean (III): “Dana emon behar jako maite dan horri”
Pianojole zaharra handitu egiten da –oraindik- azken akordea jo orduko, entzuleen txalo zaparrada entzuten duenean. Gaur ere hala izan da eta kamerinorantz daraman pasabidean, oihala behean jada, Bravo! eta Bravissimo!-ak entzuten jarraitzen du. Asetuta dago, kontzertua ederto atera zaio; bera izan da lehena horretaz ohartzen. Kamerinoko atearen ondora heltzean ikusi du: zain dauka andere heldu bat, soineko zabal eta beltz batez jantzia; saman dena perla, dena perfume; aurpegian dena margo, dena irribarre zabal zuri. Eta begiradan dena mirespen.
Sarrerako mutikoari eskupeko ederra emanda lortu du bere ametsa emakumeak: gazte gaztetatik miretsi ezezik kasik gurtu ere egin duen pianojolea ezagutuko du; sentitzen duen zirrara dela-eta ahots mehe eta dardartiaz baino ezin dio esan hau:
-Maisua, bizitzaren erdia emango nuke pianoa zuk bezala jotzeagatik.
Pianojole zaharrak ez du askorik itxaron erantzuteko eta, irribarrea izan nahi zuen keinu batez, esan dio:
-Horixe bera egin dut nik anderea; horixe bera...
Post scriptum: “Horixe bera egin dut nik anderea; horixe bera...” esateko orduan maisu zaharrak ze aurpegikera, ze aldarte, izango zuen zalantzan ibili naiz. Hauek ere erabili ditut buruan:
- ...irribarre bihurri batez, esan dio:
- ...irribarre nekatu batez, esan dio:
- ...irribarre triste bat izatera ere helduko ez litzatekeen keinu ahul batez, esan dio:
- ...irribarre behartu batez, esan dio:
- ...
Post scriptumaren post scriptum: Erakutsi dizkizuet zakarrontzi barrura bota ditudan letra batzuk, ekintza soil honekin frogatuta geratuko delakoan blogariok ere badugula zakarrontzia, badakigula zertarako den eta erabili ere egiten dugula noiz edo noiz. Besterik da zakarrontzi barrukoa ez ote den kanpokoa bezain kalitate eskasekoa. Baztertu beharko ez genukeen hipotesia azken hau.
Post scriptumaren post scriptumaren post scriptum: Hurrengo mezuan egunotan hain boladan dagoen zakarrontzi eta hozkailuen erabileraren gainean jardungo dugu. Beharbada.
Iruzkinak
oier g 2007-10-30 08:55 #1
Kaixo Jozulin de Ubrique.<br /><br />Etxakixat zela kristo egiten dirazen trackbackak beraz artesanalian esangouat. Irrati saio baterako erabilli jittuadaz hire píanúan testuak, eta hamen jagok erreferentzixia.<br />http://bitakora.arrosasarea.org/2007/10/30/asteko-aittitta-raduganian-pianua/<br /><br />Etikua eritxi jetsat abixatzia, izan be, norbera irratiko nominiakin aberastu eta hiri ezebe ez esatia, ba... ez dok morala, ta...<br />
Jozulin 2007-10-30 14:18 #2
Orakulu hori, agur:<br /><br />Ohorea da norberak idatzitakoak airetik dabizela jakitea, hortik zehar uhin hertzianoen gainetik surfean. Eskerrikasko erabiltzearren. Hori bai, aberasten zaren egunean kobraukotzut guztia.<br /><br />Ondo izan, piterpan.<br /><br />Jozulin<br /><br />p.s: irratsaioa interneten dago? bestela, bialdu ahal dostezu mp3an? ezin badozu, lasai.<br />
Utzi iruzkina: