Agur, gizon

Beti izan ditut liskarrak lagun eta senitartekoekin berdintasuna hitz magiko hori dela eta. Eta liskarrak izan baditut berdintasunaren alde apustu egiteagatik izan da. Baina berdintasunaren izenean gaur egun nagusitzen ari den korrontea feminismoa da. Feminismoari ezarri zaion konnotazioa oso da aberasgarria gizartearentzat, pozgarria eta justua. Politikari ezkertiarrek feministatzat deskribatzen dute bere burua. Baina feminismoa matxismoa bezain gogorra, krudela, kritikagarria eta injustua da. Emakumeen alde egiten du, gizonezkoak alde batera utziz. Historian zehar mundu honek egindako akatsa errepikatu baino ez du egiten. Amorruaren eragina agerian geratzen da jokabide honekin, eta txarrena denok ongi liseritzen dugula da. Botatzen dizkiguten mezu feministak, matxismoaren kontrakoak direla eta, onartu egiten ditugula. Ba nik, inola ere ez.

Irakurri gaur El Correo Español-en Eibarko orriak zekarren albiste hau.

Sexismoz kargaturiko informazioa dugu honakoa. Lehenik eta behin, igorleak: Udaletxea eta Emakumearen Mahaia, Udalak berak bultzatua. Kontuz, ez da Berdintasunaren Aldeko Mahaia. Emakumearen Mahaia da. Agur, gizon.

Martxoaren 3an afaria, nahi duten emakumeei irekia. Zein ondo. Gizonek ez dute, hortaz, bertara joateko aukerarik. Elkarte Gastronomiko zaharkituenei kritikatzen diegun berdina egiten dute emakume hauek, baina ondo deritzogu. Ez gara telebistan azaltzen hori kritikatuz, eta ez dugu inor horregatik epaitzen. Emakumeentzako afaria. Agur, gizon.

"La Calumnia" antzerkia, interesgarria, seguru. Baina, zer da tematika femeninoa? Hilekoari buruz doa? Bular-minbiziari buruz? Apustu ezetz. Desberdintasun sozialen edo tratu txarren inguruan delako apustua egingo nuke. Orduan zergatik ez tematika soziala? Edo eskubide sozialen tematika? Edo berdintasunari buruzkoa? Ez. Emakumeak dira ardatz hemen ere. Agur, gizon.

 Martxoaren 8a, Emakume Langileen Eguna izan duguna, badirudi orain Emakumearen Eguna dela. Tira ba, ospatu dezatela lanik egiten ez dutenak ere. Zabal dezagun ba jaia emakume guztietara, haien artean diskriminaziorik egon ez dadin, batu gaitezen ba, emakume guztiak gure jaiean eta diskriminatu bakarrak izan daitezela gizonak. Agur, gizon.

KTBk iragarkia emango duela, ongi ordaindua, hori bai. Emakumeekiko tratu txarren aurkakoa. Gutxiago badira ere, eta orokorrean maila desberdinean bada ere, ez ditut ahaztu nahi tratu txarrak (fisikoak eta batez ere psikologikoak, sendatzeko zailenak) jasotzen dituzten gizon horiek. Gizartearen eta Erakunde Ofizial zein ez-ofizialen babesik jasotzen ez duten gizon horiek. Gobernu eta elkarteek bizkarra eman dioten horiei: agur, gizon.