Biba! Gora! Yujuuu! Aleluia! Lortu dugu!

Hasi da lasterketa. Bazen garaia. Patxi Lopezen ekimen ausartaren ostean, Andoni Ortuzarren (*) ahotik entzun dugu Euzko Alderdi Jeltzalearen erantzun are ausartagoa: PSE-k gobernatzen dituen udaletan euskararen aldeko mozioak aurkeztuko ditu, PSE-ren "benetako asmoak" frogatzeko, agerian uzteko.
Argi dago -garden- hurrengo pausua izango dela PSE-k frogatu nahi izatea EAJ benetan dagoen euskararen alde eta proposamen "anitz, demokratiko eta integratzaileak" aurkeztuko dituela jeltzaleen udaletan. Azken urratsa izango da PP-k EAJ zein PSE-ren menpeko udaletan ekimen ezin berritzaileagoak aurkeztuko dituela edota euskara atalari dagozkion aurrekontuen igoera geometrikoa esijituko duela. Gauzak hala, eta hauteslegoaren aurrean ezin euskaltzaleago agertzeko beharrizan hori dela eta, proposamen horiek guztiak onartuko dituzte EAEko herri eta hiri guztietan. Sekulako dirutzak, txunditzeko moduko egitasmoak... Amets bat!!

Beraz: Euskaltegi, Euskara zerbitzu, Euskara talde, Mintzalagun, Herri aldizkari, Egunkari, Gueborri, Mendigoizale Elkarte, Elkarte (G)astronomiko, Swinger Euskaldunen Elkarte, Ikastola... HASI ZAITEZTE BEREHALA EGITEN BEHAR DITUZUEN GAUZEN ZERRENDA!!!

Eskatzea librea da eta ematea ere bai, jakina; baina, entzun, aprobetxatu hurrengo aste eta hilabeteotan zabalduko den "Nor da euskalt - zaleago?" lasterketa. Euskararentzako aurrekontu potoloak ikusten ditut etorkizun hurbilean. Zer behar duzue?: Beste irakasle bi?  Mintzalagunarako sustatzaileak soldata duin batekin? Ordenagailuak? Biltzeko areto bat? Garagardoa?...

Mesedez, egidazue jaramon, egizue zerrenda; ez da txantxa. Badakizue: "Egon hadi lo eta jango dunk mehe". Behin hauteskundeak pasatuz gero, agur!

Ez horregatik.