Errausketazaleak, diruzaleak alferrik zabiltzate

Gipuzkoako Hondakinen Kudeaketarako Partzuergoko Carlos Ormazabal, Denis Itxaso eta enparauek larri dabiltza. Pasa den astea, gogorra izan dute. 

Ostegunean, ekainaren 24an, Sanmarkoko Mankomunitateak, Donostia eta Astigarragako udalek 8 milioi eurotik gora zor dizkiotela jakinarazi zuen. Donostiako Udalak 8 milioi euro zor dizkio; eta Astigarragako Udalak 185.000 euro zor dizkio. Bi udalei zor zuten diru kopuruen berri eman, eta azalpenak eskatu zizkien maiatzean; baina oraindik ez omen die inolako erantzunik helarazi.

Maiatzean hain zuzen, Bixente Arrizabalagak, Astigarragako Alkateak, adierazpen gogorrak egin zituen komunikabideetan; ezker abertzaleak eta Ezker Batuak,  Sanmarkoko Mankomunitatea «haiena balitz» bezala erabiltzen ari zirela salatu zuen. Astigarrako Udalak Sanmarkoko Mankomunitatearekin zuen zorraren berririk ez zuen inondik ematen ordea. Haatik, Hernanin hondakinak atez ate biltzen hasi zirenetik, 20 egun martxan zeramala, euren udalerrian zabor kopuruak %11 egin zuela adierazi zuen. Areago, zabor igoera hori zela eta, Sanmarkoko Mankomunitateak Astigarrako Udalari 60.000 euro gehiago kobra ziezakiokela adierazi zuen. Muturra behar da gero, 185.000 euro zor dituzunean, alboko herriaren aitzikia zabaltzen ibiltzea. Halako politikoak ditugu.

Larunbatean berriz, ekainaren 26an, EAEko Justizia Auzitegi Nagusiko administrazioarekiko auzien salak, ekainaren 17an kaleratutako epai baten berri izan genuen. Bertan, kautelaz bertan behera utzi du Gipuzkoako Hondakinen Partzuergoko batzarrak Txingudiko Mankomunitatea partzuergoan sartu ahal izateko estatutuak aldatzeko hartutako erabakia. Sanmarkoko Mankomunitateko kideen ustez, «pitzatzen» hasi da Hondakinen Partzuergoaren egitura: «Argi geratu da partzuergoaren egitura administratiboa gaizki egin dela eta pitzatzen ari dela. Porrot egin dezake».

Hala ere, Carlos Ormazabal, Denis Itxaso eta enparauak mutu izan dira astean zehar.

Errauste plantako kale nagusiaren plataforma egiteko proiektuko obrak eta lur mugimendu orokorra kontratatzeko esleipen prozesuan parte hartzeko eskaintzak aurkezteko epea gaur bukatu da. Bihar, etzi edo etzidamu, berriro ere, betiko egunkari erraustegizaleak erabiliz, orriak eta orriak beteko dituzte, halako eta halako aurkeztu direla adieraziz, atzera bueltarik ez dagoela sinestarazi nahirik.

Baina alferrik dabiltza. Arrazoia gurekin dugu eta denbora gure alde. Errausketezale-diruzale hauek ez dute irabaziko. Erraustegiak ez du zentzurik eta geldituko dugu.