Laranja-lore usaina

Laranja-lore usain eztiak erakarrita dator CMAko tuareg independentista etxera, Azawadeko oasi bakanen batera, arma astuna bizkarrean.

Laranja-lore usain gozoaren arrastoan doa GATIAko tuareg Bamako-zalea etxera, Azawad mortuak ondo gordeta duen palmondo-sail urriren batera, arma neketsua sorbaldan.

Laranja-lore usain sarkorraren ondotik bueltatu da Tamanrassetera, etxera, langabeziaren morroi eternal den tuarega, miseriaren zama lotsagarria begietatik zintzilik.

Laranja-lore usain erakargarriaren usnan, jarri da kanpamentura begira, lehertutako Libian, noraezean dabilen tuarega, armak eskuan, eta erraietan.

Ilara tristea osatuz datoz Niger iparraldean tuaregen ahuntz talde mamuak, hauts artean Timia oasira. Udaberrian, uranio kiratsarekin nahasten den laranja-lore usain zorabiagarriaren atzetik.

Primadera oparoaren deiadarra hedatu da basamortuaren tripetan barrena, herioren atzaparren artetik, hondarrean belo, zapi urdin zartatuen artean, ustelduz doazen gorpuen gainetik.