Hamaika arrazoi AHT honen aurka

Atzo, Berria egunkarian, Jonjo Agirre, Altsasuko Aralar-NaBaiko zinegotzi ohiaren guttun bat agertu zen. Guttunan amaika arrazoi jartzen du Jonjok, AHTren aurka agertzeko. Iritzi artikuloak kontraste handia egiten du beste honen aldean, Aralarko kordinatzailea den Txentxo Jimenez eta atzo ere Diario de Noticias-en agertu zena. Hemen, Altsasuko herritarraren guttuna erreproduzitzen dugu Berrian agertu den bezala, baina Altsasu Zaindu blogean ere agertzen da, euskeraz eta erderaz.

Konponezineko kalteak: hesi-ondorioa, zarata ikaragarria, paisaiari eginiko eraso bortitza, lurren okupazioa, akuiferoen suntsiketa, energia kontsumoaren biderkatzea, hondakinentzako hamaika zabortegiren sorrera, balio ekologiko handiko ekosistemen kaltetzea...

Desoreka iturri: hiriburuen arteko lotura besterik ez du egingo, hirietan aglomerazioa bultzatuko du eta kalte larriak eragingo dizkie nekazaritzari eta oro har herrietako eta nekazaritzako eremuko bizimodu eta bizi-kalitateari.

AHTak lan baldintzen ezegonkortasuna areagotu eta deslokalizazio industriala erraztu egingo du.

Guztiok ordainduko dugu, baina gutxi batzuek erabili ahal izango dute soilik, joan-etorrien %95 ez dira-eta hiriburuen artekoak, herrien artekoak eta herri eta hiriburuen artekoak baizik, berez defizitarioa den elite batentzat pentsatutako garraiobidea...

Gizarte gastuak murriztea eragingo du: dirutza horrekin, populazio guztiarentzako kalitatezko garraio publikoa finantzatu eta bestebehar sozial askori erantzun lekieke.

AHTak ez ditu konponduko egungo garraio arazoak: politikari gehienak gezurretan edo ezjakin...

Batetik, hirietan geldituko da soilik. Beraz, ez ditu murriztuko eskualde barruko joan-etorriak.

Bestetik, ez dio kamioi kopuruaren urtez urteko hazkuntzari ere aurre egingo.

Autobide, superportu, plataforma logistiko eta abar biltzen dituen azpiegitura plan erraldoi baten parte da AHTa; garraioa negozio den heinean, garraioaren hazkundea muga gabe bultzatzea helburu duen plan baten parte, alegia.

Alderdi politiko gehienak adarra jotzen ari zaizkigu beste behin ere, edo hori bezain txarra dena bestela, alderdi batzuek ez dakite zertan ari diren ere. Nafarroako Parlamentuan ordezkaritza duten alderdi eta koalizio guztiek eman diote oniritzia AHT honi. UPSNtik hasi, IUNetik igaro eta NaBai-n bukatu, batek ere ez du praktikan ezer egin jostailua ordaindu beharko dugun herritarroi informazioa eskaini eta parte hartzea ahalbidetzeko. Batek ere ez.

Batere gardentasunik gabe, propaganda eskaini digute Informazioaren ordez. Udalerrien zein herritarren interesei, nahiei eta borondateari bizkarra emanda ari dira guztiak; batzuek sustatzen, eta besteak, era batera edo bestera txikizioari babesa emanez.

Noren mesederako da AHT hau?

BERRIAn bertan Julio Villanuevak gogorarazi dizkigu zenbait datu mamitsu. Adibidez: Munduko hamar eraikuntza enpresa handienetatik zazpi espainiarrak direla; Espainia munduko 5. zementu kontsumitzailea dela, Europan autobia-autobide kilometro gehien duena eta 2020rako AHT kilometro gehien izango duena munduan... Mundu zabalean lanean ari diren mafien ustez, Espainia aukera handiko eremua omen da... Europako estaturik ustelenetakoa omen da Espainiako erreinua...

Horregatik guztiagatik, besteak beste, badago nahikoa arrazoi bidegabekeria horri aurre egiteko, ezta? AHTa gelditu, bada!

Jonjo Agirre.
Altsasuko Aralar-NaBaiko zinegotzi ohia.

Actualización: en Altsasu Zaindu destripan el comentado articulo de Txentxo Jimenez.