Zortziko artaldea

                                  KORSIKA (2007)

Aurtengo Aste Santutan Korsikarako bidaia proposatu zigun Josuk eta gehienok zalantza handiegirik gabe apuntatu ginen. Batzuek lehendik ere egina genuen bidaiaren bat berarekin eta besteek aldiz, gurasoei edo kalean entzunda bazuten bere berri. Elkartutakoak 33 urtez berakoak izan gara eta beraz, batzuen gurasoak Josurekin bidaiaren bat eginak ziren arren, gu bigarren txandakoak ginen. Nairobitarra autobusa ez genuen ezagutu baina ikusi eta entzundakoarekin bakarrik ere inbidia latzak pasatakoak gara. Beraz, Josu Nairo Txikirekin hasi zela jakin eta aukerak sortu zitzaizkigunean pozik hurbildu gintzaizkion abentura berriei ekiteko. Nairo Txiki deitzen hasiak dira batzuk baina Nairo Handi ere deitu geniezaioke barruko bizipenei begiratuz gero.

Zortzi ardi txuriz eta noski, ardi beltzez osatutako artalde polita elkartu ginen. Gehienak Tolosaldeko larre motzetan hezitakoak, nahiz eta tartean beste larreetakoak ere elkartu. Bere hitzetan meritua ere bai zazpi emakume artean bi gizonezko bakarrik izatea, baina ederki asko moldatu ziren.

Bidaiatzeko modua beti betikoa du, Mc. Gyberren eskailerarekin otordu mahaia osatu eta mahai egurrarekin ohea. Denak du zentzua furgoneta barruan, ez du askorik behar nonbait bederatzi lagun horren espazio txikian elkarbizitza duin bat eramateko moduan jartzeko. Aurrealdeko eserlekuak berriz, barrenak hustutzeko konfesionario txiki bihurtzen dira Josuren aldamenean, baina besteren istorioak entzunaz berea ere kontatuko dizu, eta pixkanaka zeure egingo dizkizu bere bizi filosofi eta umorea.
Diziplina ere behar beharrezkoa da ordea eta geure egiteko txikiak ikasi ondoren ardura nagusia bere gain utzi genuen. Zortea izan genuen eta ez zen aparteko arazorik izan, matxurarik ez eta elkarbizitza ikearriya.
Ferry-an Ajaccio-ra iritsi eta erlojuaren aurkako norantzan ekin genion Korsika ezagutzeari. Ajaccio, Propiano, Cala Figari, Bonifacio, Corte, Restonica, Ile Rousse, Calvi, Bastia, Vizzavona..., leku eta paraje dotoreak ezagutu genituen, baina gogoangarriagoak zaizkigu lortutako giroa eta egindako lagun berriak. Bidaiak hamar egun iraun bazituen ere geure oroitzapenek askoz ere gehiago. Egindako adiskideekin lagun taldetxo berria osatu dugu eta baita geure proiektu berriak gauzatu ere.

Beraz, hemendik mila mila esker Josuri den bezalakoa izateagatik eta baita besteoi ere horrenbeste transmititu eta emateagatik. Zeuk erakutsitakotik Ruper Ordorikaren hitz hauekin geratuko gara:

" Haize goxo goxoa
Atera nazazu arren
Geroaren liluratik.
Ez dadin alperrik galdu
Unerik uneko saria
Oi haize, haize goxo goxoa "