Angel eta Josu, izatezko bikoteen aitzindari

                        (2006ko Amalur Jardunaldietako aurkezpena)

Arratsaldeon! Amalur izeneko bidai jardunaldi hauei hasiera emateko, Tolosan aurkezpen handirik behar ez duten bi bidaiari tolosar dakarzkigu hona.

Izatezko bikoteen aitzindari izan diren hauek, Adan eta Evak baino paradisu gehiago eta hobeak ezagutarazi dizkigute.

Isabel eta Fernandok “una, grande y libre” osatzeko lurralde desberdinak inbaditu eta elkartu bazituzten, bi hauek kultura eta herri desberdinak erakutsi dizkigute.

Don Quijote eta Sancho Panza injustiziaren haize erroten kontra borrokatuz milaka kilometro egin bazituzten “piel de toro-n” zehar, ondoko hauek, bere Rocinante mekanikoaren gainean, milioi bat kilometro (Ama Lurrari 25 buelta oso, ez da makala!) korritu dituzte 25 urtetan zehar, 2.000 lagunen ilusioak eta esperantzak betez 100 bidaitan, Europa, Afrika eta Amerikan zehar.

Jesu-kristo eta Angel Cristo (hor atzeko argazkian ikus dezakezue Angel kristo bat eginda) oso zeregin eta helburu desberdinekin ibili ziren munduan zehar. Bi hauen artea, ingurumena eta kirola uztartuz, afizioa ofizioa bihurtzea izan da, besteen oporrak bere bizimodua egitea. Zenbat lan egin behar den lanik egin gabe bizitzeko!

Guinness record baten bila ez ziren joango, baina gaur egun modan dauden Gran Hermano, Basetxea edo El conquistador del fin del mundo sortu baino lehen marka guztiak hautsi zituzten, babarrunak, txapelak edo xaxuak bezain tolosarra den bidai estilo bereziaren labela ezarriz.

Atalloarra, Mugiroarra, Roncalesa, Burundesa eta Veloz Sangüesina motz gelditu zitzaizkien mundua ezagutzeko eta, Gordini zahar batekin hasita, Nairobitarra sortu zuten. Agentzia matrimonial askotan baino bikote gehiago sortu dira bertan.

Lehen aipatutako bikote ospetsuekin batera eta Romeo-Julieta, Zipi-Zape, Tapia ta Leturia bezala, orain atera duten tribial jokuan, bikote bezala onartzea proposatzen dut: Angel Mari eta Jesus Mari (ze izen zerutiarrak!), Angel eta Josu.