NS/NC

(Merkatu-ikerkuntza irakasle baten purrustada)

Boterea duenak galdetzeko baimena ere badu. Baimena eta beharra. Galdetuz, itaunduz, inkesta eginez, bere sudurra azken izkinaraino sartuz eusten dio botereari boteredunak. Besteok, menpeko horiok, erantzutea besterik ez dugu.

Non ibili zara? galdetzen digu amak.

¿Qué hacía usted sentado a las ocho de la mañana en un bar cerrado? galdetzen digu poliziak.

Zein da abangoardia sobietarren garrantzi politiko eta artistikoa? galdetzen digu irakasleak.

Ze detergente marka nahiago duzu? galdetzen digu inkestatzaile irribarretsuak.

Baina halako batean, matxinatzeko gogoekin esnatu eta boteretsuen galdera gehiagori erantzunik ez diogula emango erabakitzen dugu. Kitto.

Nondik ibili zara? Hortik. Norekin? Horiekin. Zertan? Horretan. Nerabe egin garenaren seinale, amaren boterea murriztuz doala, hortaz.

¿De quién es esta llave? Nire abokatuaren presentzian baino ez dut hitz egingo. Pelikula gehiegi ikusi dugunaren seinale.

Zein da Auguste Comtek positibismoari egindako ekarpena? Hutsik uzten dugu azterketa eta harro-harro entregatzen diogu paper txuria irakasleari.

Norekin zoaz erosketak egitera eta nork erabakitzen du zer erosten duzuen? NS/NC.

Ez daki/ez du erantzuten da inkestatzaileek, merkatu-ikerketetara dedikatzen diren orok, gehien gorroto duten erantzuna. Ihardespen hori hutsaren hurrena delako. Denbora galtze bat. Haien botere ahalguztidunaren pitzadura.

Eta hala ere NS/NC erantzuteko eskubidea gurea da. Nahikoa dugu merkatuak inposatzen dizkigun moda, beharrizan, antsia, grina, ordainsari, beldur eta promesa faltsuekin. Nahikoa publizitate bonbardaketa, tono, politono eta sonitono deskarga, derrigorrezko opari-garai eta audimetroen kontrolarekin.

Laborategi-sagu moduan erabili nahi gaituztenean zirika dezagun galdetzailea. Euren laban merkantilistak zorrozteko gu erabiltzen gaituztenean gera gaitezen isilik. Edota hainbat hobe: erantzun dezagun lau letra sinple hauekin: NS/NC.