Literatura interaktiboa

Oraingo honetan Joxek literatura Web2.0  erara lantzeari buruz gure iritzia plazaratzera gonbidatu gaitu. Proiektua nahiko interesgarria dirudi, interneten bitartez eta etxetik mugitu gabe  nolabaiteko bilera literarioak sortzen dira liburu baten inguruan, bakoitzak modu antolatu batean bere iritzia eman eta hau besteekin  eztabaidatzeko aukera du.  Bestalde, liburua  irakurri ondoren,  sorkuntza bultzatzen duten zenbait proiektu proposatzen dira  eta ikasleek bat aukera eta gauzatu behar dute: liburuari buruzko poster bat, gaiarekin zerikusia duen olerki bat edo  komiki bat diseinatzea  esate baterako.

Irakurketa bultzatzeko ekimen polita iruditzen zait, gainera, bakoitzak obrari buruz duen ikuspegi pertsonala besteei transmititzea eta era berean besteen ikuspegia  ezagutzea oso aberasgarria gertatzen zait. Hala ere,  ez legoke txarto noizean behin sarean bildutako irakurleak  haien artean geratzea, kafetegi batean adibidez, harremanak estutzeko eta hobeto ezagutzeko, sarea batzutan nahiko inpertsonala baita.

 Bestalde irakurketaren aldeko aipamena egin nahiko nuke; gaur egun gero eta gutxiago irakurtzen da, denbora faltaren  moduko aitzakiak  arrazoien artean nagusituz ( telebista ikusteko denbora bai,  baina ez ordea irakurtzeko).  Honen aurrean  gauza bakarra esan dezaket , gutxi direla etxean epel-epel, maindire batekin, musika lasaia entzuten duzun bitartean, irakurtzeari parekatzen zaizkion atseginak; sentsazio berezi eta pertsonala sortzen du, deskriba ezina, bakoitzak ezberdin  sentitzen baitu, egizu proba, ez zara damutuko!