Kungsleden, 1.etapa: Abisko-Abiskojaure

Goizean eguraldi beldurgarria egiten zuen: elurra eta haize bortitza. Egoera honetan bilerara deitu gaitu Josuk. Kontua da zer egin, abiatu ala beste plan bat antolatu. Ez zegoen argi gure artean eta eguraldi iragarpenak ikusi ditugu internetez. Ez ziren oso baikorrak baina ez geunden denok ados: batzuk optimistago besteak baino. A plana utzi eta B eta C planak ere aktibatu dira. Hala ere, eguerdira arte itxoitea erabaki dugu. Dena dela 11:00etarako urdinuneak agertu dira eta irteteko prestatu gara. Traste guztiak batu, pulkak prestatu eta 11:20 inguruan abiatu.

Gaurkoa aklimatazio eguna da, batez ere pulkak ondo doazen probatzeko eta egun aproposa daukagu horretarako. Arrastoa egina dago baina haizearen eraginez une batzuetan ez hain garbi. Halako batean okerreko bidea hartu dugu, baina Josu konturatu da eta berehala zuzendu dugu. Hortik aurrera eguraldiak txarrera egin du eta eskerrak elurretako motoak pasa diren, bidea jarraitzea erraztu baitute. Gero lakura iritsi gara eta haizearen indarra nabarmenagoa izan da. Nolanahi ere, hau zeharkatzeko 4 Km. daudenez, laster iritsi gara aterpetxera. Ibilbidea 14 Km.koa izan da eta 4 ordu inguru egin dugu.

Aterpean estufa piztuta dago eta epeltasun goxoak hartu gaitu. Arropak lehortzen jarri, aldatu eta zerbait jan eta gero solasaldi lasaian egon gara. Laster amaitu da lasaitasuna, dozena bat laguneko taldea iritsi denean. Orain, sukaldean, afaria prestatzen hasi garenean, giro zaratatsu bihurtu da. Afaldu eta lotara goazela norbait atera da kanpora elurretako komunera eta haren oihuak entzun ditugu: Aurora, aurora! Ez da ba izango Josuren izeba Aurora! Ez, aurora borealaz ari da. Berehala denok kanpora atera gara aurora ikustera. Izango dira egun hobeak ikusteko baina gaur ere ondo ikusi dugu.

De Abisko-Abiskojaure