Hillerod-Fredeikssund-Kulhuse-Frederiksvaerk-Hillerod

 Ostirala, azken eguna hemendik zehar ibiltzeko, bihar etxerako bidea hartuko dugu-eta. Gaur mendebaldera goaz, Roskildefjord zeharkatuz Selandiako lurmuturrera. Frederikssund aldera abiatu gara errepide nagusitik hasieran, eta 3. mailakoak jarraituz gero. Kostaldea turistikoa da eta hango jendeak bigarren etxebizitzak dauzka fiordoan zehar. Daniarrak belauntzietan ibiltzen dira zonalde honetan. Fiordoaren alde batetik bestera pasatzeko zubia zeharkatu behar dugu, baina zubia jaso egiten da belauntziak pasatzeko.

Fiordoaren beste aldean portu txiki bat aurkitu dugu eta han egin dugu geldialdia zerbait jateko.Baina, hemendik aurrera, basoa da nagusi kostaldean eta ibilbide oso polita da penintsularen muturrera iritsi artekoa. Pagadi ederrak daude itsasoaren mailan. Zerua ilundu da eta euri zaparrada gogor hasi da. Baserri batean aterpea aurkitu dugu eta beste bi txirrindulari ere han babestu dira. Kulhuse da azken herrixka eta aurrera jarraitzeko itsasontziz zeharkatu behar da fiordoa. Bizikletak sartu eta ordu laurdenean beste aldean gaude Solager herrian. Hemen eskubirantz egin dugu, 40. ibilbidea jarraituz Frederiksvaerk herrira heldu arte.

Konturatu gabe kilometro asko egin ditugu eta tripetan zorriak hasi zaizkigunez bazkaltzeko tokia aurkitzea izanda lehen egitekoa. Herri lasaia da eta pizzeria batean eseri gara zerbait jatera. Bertako mutila kurdoa da eta ez da oso ondo moldatzen hizkuntzekin, baina elkar ulertzea ez da zaila. Aspaldiko partez Tourreko etapa ikusi dut telebistan. Azkenean kurdoen eta euskaldunen egoeraz hitz egiten bukatu dugu.

Oraindik asko falta zaigu Hillerod herrira iristeko eta Pakek esan dit nahikoa egin dugula eta trena hartzea hobe dugula. Gaur kasu egin diot eta trenera igo dugu bizikleta eta guzti. Aterpera iristean bizikletak itzuli ditugu eta biharko maleta prestatuz Selandiako egonaldiari amaiera eman diogu. Bihar trena hartu eta zuzenean aireportura joango gara.