Ordiziako Udalaren jarrera hipokrita salatzeko bi gazte udaletxean kateatu dira

---

Video con subtítulos en castellano

Gaur goizean, bi lagun Ordiziako Udaletxeko balkoian kateatu egin dira Udala AHTren gaian erakusten ari den itxurakeria, maltzurkeria eta jarrera zitala, baita herritarrenganako azaltzen ari den errespetu eza, zabarkeria eta mespretxua salatzeko.


Goizeko hamaikak aldera bi pertsona igo dira Ordiziako Udaletxeko balkoira eskailera baten bidez. Bertan kateatu aurretik pankarta handi bat jarri dute balkoian.

Bitartean, eskailerarekin kalean zihoazen lau gazteak kaleko arropaz jantzitako bi ustez ertzainak zirenek gelditu eta identifikatzeko agindu diete. Bi pertsona horiek ez dute beren plaka atera nahi izan eta paretaren kontra jarri dituzte gazteak modu agresiboan. Miaketa egin ondoren, Ertzaintzaren furgoneta bat iritsi da eta "os vais a comer todo el marrón" eta antzekoak esan ondoren, eskailera hartuta joan dira.

Udaletxean berriz, modu zakarrean aritu den bakarra udaltzain-emakumea izan omen da. Ertzainak berehala iritsi dira eta kateak ezin zituztela hautsi ikustean, suhiltzaileei deitu diete. Hauek iritsi direnean kateak moztu dizkiete.

Kateatu direnek ordubete inguru egin dute balkoian, eta beheran babesa agertzeko bildu diren hogeita hamar pertsona inguruk informazioa banatu eta oihuak ozen entzunarazi dituzte jendez beteta zegoen Ordiziako plazan.

Gaur asteazkena izaki, baserritarrak eta jende heldua nagusi zen bertan eta desobedientzia ekintzan parte hartu dutenek eskainitako informazio-orriak gustura hartu eta interesa agertu dute. Badirudi, horrelako ekintzek udaltzain "batzuengan" harrera oso txarra sorrarazten badute ere, herritarrak, pixkanaka ohartzen ari direla AHTren aurkako borroka guztion borroka dela.

Hona hemen gaur goizeko desobedientzia ekintza baketsuan zehar banatutako eskuorrien edukia:

Ordiziako Udala, ITXURAKERIATAN itotako Udala

Goierriko AHT Gelditu! Elkarlanak gogor salatu eta lau haizetara zabaldu nahi du Ordiziako Udalak Abiadura Handiko Trenaren auzian erakutsi izan duen eta erakusten ari den itxurakeria, maltzurkeria eta jarrera zitala, baita herritarrenganako azaltzen ari den errespetu eza, zabarkeria eta mespretxua.  Hori guztia esateko hamaika arrazoi ditugu ordiziarrok, eta oraingoan AHT hizpide hartuta are gehiago direla esan genezake:

 

• 2008ko apirilaren 6an, Eusko Jaurlaritzako Garraio Sailburuaren ahotik Ordiziako Alkatea AHTren inguruan informazioa ematen eredu dela irakurri behar izan genuen Diario Vascon. Ordiziako Udalak, inoiz ez ditu herritarrak informatu, ez azpiegituraren gainean espresuki egindako galderei erantzunez, ez eta herritarrei gutxieneko lau lerro iritsarazten ere. Ezagunak izan ziren herrian, aurreko alkate Alejandra Iturriozen adierazpenak duela urte eta erdi, Udalean informaziorik ez zutela (berak ere ez baitzekien Udaletxean plano guztiak bazituztela) eta teknikoak azalpenak ematera ekarriko zituztela esan zituenekoak; bai eta EAko zinegotzi ohiak AHTak Ordiziako Udalerrian kaltetuko lituzkeen uren azterketaren bat egin beharko litzatekeela adierazi zuenekoa, edota oraingo alkate Jose Miguel Santamariak, obrak hasi baino astebete lehenago gaiaren inguruko ezer ez zekiela esandakoa. Hori, zuen buruak Udaleko ordezkari gisa dituzuen jaun-andreak, herritarrak nahita desinformatzea, gezurrak esatea eta ezgauza izatea da.
• Maiatza hasieran, Ordiziako buzoi guztietan Udal Gobernuko alkate eta zinegotzien aurpegi alaiekin batera, “Euskal Y”ari buruzko propaganda jaso zen, Ordiziako Udalbatzaren laguntza osoarekin eta gu guztion diruarekin ordainduta noski; “Garapen Iraunkorraren Trena” saltzeko Eusko Jaurlaritzaren beste ahalegina. Lotsagabeki ari dira gezurretan. Trenaz hitz egiten dute, garraiobide jasangarriena eta gutxien kutsatzen duena dela diote, baina AHTa abiadura azkarrean joango litzatekeela esatea ahaztu, nonbait; noski, hori esateak ohiko trenak baino 6 bider energia gehiago xahutzen duela esatea baita, edo azpiegitura eraikitzen isuriko den CO2 guztia AHTa bera “aurrezten” hasteko 100 urte igaro beharko liratekeela, AHTa ingurumenaren ikuspuntutik Euskal Herrian egin den azpiegitura suntsitzaileena izango litzatekeela, etab. etab. etab.
• Ordiziako alkatea aktiboki aritu da lurjabeekin desjabetzen inguruan “adostasunera” iritsi nahian. Alkateak, lurjabeek bezalaxe, ez daki ezer desjabetzen inguruan, eta Eusko Jaurlaritzako ordezkariek esandakoa hitzez hitz besterik ez daki errepikatzen. Nola bestela hasi dituzte obrak lurjabeei desjabetzak egiterakoan gutxieneko bermea ematen dieten desjabetze-prozesua martxan jarri gabe? Akten altxamendua egitea ezinbestekoa da lurjabeak administrazioaren aurrean dituen eskubide urriak defendatu ahal izateko, eta horixe ari dira egiten eta egin dituzte AHT pasako litzatekeen gainerako herri guztietan. Baina Ordizian ez. Eta ez dira egin lurjabe guztiekin banan-banan hitz egitera joan zen alkateari esker. Berari esker, lurjabeek akordio pribatuak sinatu dituzte enpresekin, eta berari esker, Eusko Jaurlaritzak Gipuzkoan obrak hasteko zuen antsia bete da.
• Obrak hasi zituztenean, alkateari jakin zitzaion hilabete aurretik sartutako 2.100 alegazioetatik bat bera ere ez zela erantzun. Alegazio horiek herritarrok azpiegitura honen eta zehazki eraiki behar den zatiaren inguruan ditugun zalantzak eta argudioak helarazteko administrazioak ematen duen azken aukera da. Ordiziako Alkateak, hori jakinda ere, Eusko Jaurlaritzako ordezkarien hitza ontzat hartu eta inolako erantzunik ez du eman horren inguruan.

Horregatik guztiagatik, eta ez luzatzearren aipatu ez ditugun beste hainbat eta hainbat gaigatik, Ordiziako Udalak AHTren gaian eta orokorrean herritarrenganako erakutsi duen jarrera gogor salatu eta herritarrak azpiegitura suntsitzaile, xahutzaile eta bidegabe hau baztertu eta deitutako mobilizazioetan parte hartzera deitzen ditugu.

KONTZENTRAZIO ZARATATSUA, ekainak 20, ostirala

o       19:00etan Ordiziako eta Beasaingo plazatik.

o       19:30ean Malkaskon

Entzunarazi zure ahotsa!!!

MENDI-MARTXA, ekainak 28, larunbata

o       11:00etan Beasaingo Zubimuzutik.

Atera txikizioaren zure argazkia!!! Mariaratzen egiten ari diren sarraskiaren berri emateko argazki lehiaketarako.