Orain zinegotzi-ohiak?!

Arrasateko zinegotzi-ohi sozialista bat erail du ETAk, Isaias Carrasco, etxetik ateratzerakoan, alabarekin, lanera zihoala.
Proportzioa eta errealitatea ahazteko arriskua dugu, hainbeste urteko sarraski gero eta zentzugabeago honen zurrunbiloan. Zer egin bide du Isaias Carrasco langileak heriotza merezi izateko? Zein zen haren errua? Sozialista izatea. Inoiz zinegotzi izana!

Zergatik Isaias? Zer egin du Isaiasek beste zinegotzi-ohi sozialistek egin ez dutena? Ezer ez, ziur aski. Isaias erail dute erraza zelako, bizkarzainik eduki ez eta haren joan-etorriak norbaitek zaindu eta txibateatu dituelako.

Niri, lazgarriena iruditzen zaidana itua, biktima, ausaz hautatze hori da: "norbait hil beharra zegok; noren datuak zeudek prest ekintzarako?; Arrasateko zinegotzi izandako batenak; tira ba, horixe."

Eta Isaiasi tokatu zaio. Hori latzagoa da niretzat, gordinagoa, larriagoa ez bada ere, beste guztiok etsaitzat hartzea baino, beste guztiok hiltzeko ahalbidea baino. Inoren heriotza hauteskunde-kanpaina egiteko erabiltzea eta nor hori ausaz aukeratzea. Horra hor gure izenean hiltzen dutenen bihotz gabea, ankerra. Horra hor terrorismo horren absurdoa.

ETA terrorists kills in Arrasate a worker, former local council member.