Euskaldunak Txinara, lehen eta orain (III)

EUSKALDUNAK TXINARA, LEHEN ETA ORAIN (III): GAUR EGUN (1990ETIK)

Txinako gobernuak 1970ko hamarkadaren amaieran baimendutako irekiera ekonomikoa zela medio, merkatu-ekonomia ekonomia planifikatua ordezkatzen hasi zen, atzerritar enpresa ugari erakarriz eta zerbitzuen ekonomia bultzatuz batez ere 1980ko hamarkadatik. Testuinguru honetan, 1990ko hamarkadatik eta batez ere 2000ko hamarkadatik, euskal jatorriko enpresak eta zerbitzu arloetako langileak agertzen hasi ziren Txinan, bankagintzakoak eta gazteleraren irakasleak barne. Halaber, azken urte hauetan Txinako gobernuak futbol entrenamenduaren gainean emandako arreta dela-eta, bertako harrobiek atzerritar futbol entrenatzaile kualifikatuak eskatzen dituzte. Testuinguru honetan euskal jatorriko entrenatzaileek ere lortzen dute lana bertan. Horietaz gain, perfil ezberdinetako euskaldunak, hala nola, ikasleak, kazetariak, artistak, kirolariak eta bidaiariak, ere Ekialde urruneko herrialde horretara doaz.