IRITZIA. Tolosan ere emakumea pilotari
Iragan larunbatean, hilaren 14an, Tolosako Usabal kiroldegian jokatu zen Euskal Herriko Bertsolari Txapelketa Nagusiko 3. finalerdian ere present izan zen emakume pilotarien egoera. Ainhoa Agirreazaldegi eta Uxue Alberdi bertsolariek hausnartu zuten gaiaren inguruan elkarrekin zortziko txikian egindako bertsoaldian. Jarraian duzue oso-osorik.
Gaia: zu, Ainhoa, pilotaria zara eta partida bat jokatu behar duzun bakoitzean kandela bat jartzen dio Uxue amonak Ama Birijinari. Azkenaldian, ez duzu partida bakar bat ere irabazten.
|
1. Ainhoa Nahizta kandela ari den pixkanaka urtzen goitik inortxok ere neri ez dit laguntzen jainkoarekin nago hasita beldurtzen neska pelotariak ez ditu ezagutzen |
2. Uxue Pelotan neskatila hau dabil galako galtza txuriak jantzi dejada ta salto jainkoa zure alde ez da jartzen bapo baina justu jainkoa gizona dalako |
|
3. Ainhoa Frontoian gehiegitxo ez dira bi paret, baina, nere kasara, zer egin dezaket? Nola lagunduko dit gizon jainko batek? Zure sorginkeritan gehio sinisten det |
4. Uxue Nere ustez ona zen kandelan taktika baina aldatuko det neraman praktika irabaziko dezu partidua ti-ta Anbotoko Mariri kandela jarrita |
|
5. Ainhoa Anbotoko Mari da dama dotorea ta hark ni laguntzea a zer ohorea hari kandelarikan ez jarri, ordea, amona jarriozu eguzkilorea |
6. Uxue Ekiren babespean ondo egongo zara neska ta pelotari dena duzu traba hartu zazu amonan muxu ta eupada, zuk jolastea soila irabaztea da |
Gure eskerrik beroenak hemendik biei, 1700 lagunen aurrean goxotasun eta egiazkotasun izugarriz egindako gogoeta honengatik.
Espero dezagun bakarren bati eragingo ziola zer pentsatua. Izan ere, Jainkoak ez dakit, baina, lurtar asko eta askok ez dakite gu bagarenik ere, eta beste bakarren batzuk nahiago lukete izango ez bagina. Hala ere, gure bidean jarraituko dugu, inurri lanean, emakume pilotarien ahotsa ahalik eta txokorik gehienetara hedatzeko asmoz.
Uxue Fernandez Lasa
Iruzkinak
gatiaz 2009-11-19 22:13 #1
Poztekoa da horrelakoak entzutea (kasu hontan irakurtzea).<br />Inurri lan hori epe luzerako izanten danez, lortu behar diranak eta bi lortuko dira. Pasa dira daoneko 4 urte eta Emakumea Pilotari proiektua sasoitsu dabil ekimenean batez ere. Laguntza ekonomikoak falta dira soilik, bestetan denon bulkadakin aurrera aterako baita.<br />
Uxue Alberdi 2009-11-20 14:06 #2
Kaixo, neskak!<br />Bene-benetan poztekoa da Ainhoa eta niretzat zuei poza eman ahal izatea. Uxue (fernandez), zuri ere eskerrak: gaia entzun aurretik ikusi zintudan publikoan, eta erabakiorra izan zinen gaiari heldu genion moduan heltzeko.<br />Muxu haundi bat, eta segi dezagun bideak marrazten!!<br />
Utzi iruzkina: