sinestea

Argiaren abiadura soilik bada eztabaidaezina,

erlatiboa da ikusten duguna

sentitzen duguna

erlatiboa ordulariak hain zehatz markatzen digun denbora

jaio ginen eguna

erlatiboa da pankartaren atzean salatzen dugun eskubide urraketa

erlatiboa hiltzeraino defendatu nahi dugun herria

heriotza ere erlatiboa delako.

Zalantzan jartzen dugu orduan

erlatibizatzen

garena

ba ote garen

bizi garen, hilik gauden

izatea zer den

baina ezin zalantzan jarri

pentsatzen duguna

sentitzen duguna

hiru dimentsiotan ikusten duguna.

Erabaki beharra daukagu bizi duguna errealitatea den edo fartsa

geure egia ez ote den gezurra, besterik gabe

erabaki beharra daukagu

erabakitzeko aukerarik izan gabe

argiaren abiadura ez delako geurea

erlatiboa ez den ezer ez dagoelako geure esku

sinestea baino ez zaigulako geratzen

izaten jarraitzekotan

izatea zer den jakin gabe.