Atzerritarra
Tximeleta bat ikusi eta atzetik joaten natzaio, kometa bat edo ortzimuga bera ikusten ditudanean bezala. Oin-zolak finko dauzkadan tokitik altxa beharra sentitzen dut, txikle erraldoi bat zapaldu eta itsatsita nengokeen beldur.
Badakit zelaiotan txiklerik ez dela, ortzimugara iristerik ez dudala dakidan moduan. Barruak eskatzen dit, ordea, alde egiteko hemendik, ihes joateko hara edo harago, berriz itzul naitekeela-eta. Hala, joaten naiz, banoanez, baina nekez nahiz itzultzen, banoan honek ez baitu banatorrenaren antzik izaten.
Hargatik, bueltakotan atzerritartzat jotzen nautenean lagunen begiek, nintzena bihurtzen saiatzen naiz, kosmopolitismo zantzu oro ezkutatzen. Berriz etxeko sentitzea lortzen dudanean, aitzitik, barruak ez dit aduana pasatzen uzten, niganako pasaportea iraungitzen zait bat-batean. Kitto eta galdera dator: non izan nahi dudan kanpotar, nire herrian edo nire baitan.
Dakiena kontatzen didanak berak adina jakin dezadan gutxienez, nirekin lehen baino askoz denbora gutxiago ematen duenak, dakienak zeri diodan panikoa, deitzen didanak ezer ez esateko, mozkortzen denean soilik aitortzen didanak maite nauela, besarkatzen dudanak egunero lau aldiz. Horiek badakite non izan nahi dudan atzerritar. Ondo jardun ninteke, edo gaizki ari naiz, baina, barka iezadazue, halakoa naiz oraingoz (natorren honetan) eta harreman folkloriko behartuen aldean, nahiago dut denbora sentimenduak eta ideiak integratzen galdu.
Iruzkinak
e^x 2011-06-28 16:06 #1
Nik ere badakit zer den<br />joatea ta itzultzea,<br />zu guztiz aldatu arren<br />denak berdin jarraitzea,<br />gertatzen bada orduan<br />etxean ez aurkitzea<br />agian berriz hutsetik<br />eraiki behar da etxea.<br />Sentitzen dezuna egin<br />ta egina sentitzea,<br />kanpokoen eran barruko<br />tximeletei segitzea,<br />sufritzea, maitatzea,...<br />Ez al da hori bizitzea?<br />Sarritan ez da komeni<br />gehiegi integratzea...<br />
errailak 2011-06-28 23:14 #2
Arrotz bazaizu sentitu<br />zenuen sentimendua,<br />ideia atzerritarrez<br />bete bazaizu burua,<br />onartu egin behar dira<br />ez hasi aurka gudua<br />hori delako bizitzan<br />integratzeko modua<br />barrutik hasi behar da<br />sortzen gure ingurua<br />neronekin izan nahi dut<br />leiala ta segurua<br />sortzen baitit sekulako<br />panikoa, apurua<br />norbera baino gehiago<br />ezagutzeak mundua.<br />
orhiko sorgina 2011-06-30 17:58 #3
berekoikerian aurka<br />a ze nolako burruka !<br />nahiago dugu ibili<br />ondokoa lagunduta<br />ta hargatik kanporantza<br />bidaia hasi ta buka<br />tximeletak, atzerria,<br />ta ortzimugaren punta...<br />Baina ez bagaude gure<br />barnekoan iltzatuta<br />ezinaren etsipena<br />ezin inola izkuta<br />gure burua ez dugu<br />oraindikan aurkitu ta<br />hargatik ibiltzen gara<br />munduan barna galduta<br />
Utzi iruzkina: