18/98. Eta zer gehiago?

Sorpresa  handirik gabe hartu dut gaur 18/98 auziko epaia. Jakinak eta esperotakoak ziren zigor erraldoiak besterik ez. Eta auzipetuei tratu nardagarria.

Epaiaren irakurketa oraindik amaitu gabe zela, bere burua progresitatzat daukan Espainiako telebista kate batean, CUATROn, solasean ari ziren gaiari buruz.

Denek azpimarratu dute "JUSTIZIA" zoriondu beharra. Denak ziren gustura. Euskal Herrian entzun eta ikusi ditugun irregulartasun usain arrastorik ez dute hartu. Ez diot hemen "dena ETA da" teoriak sortzen duen haserrea sentitu behar luketenik, baina nazioarteko jurista taldeek egindako salaketen berri jakiteko adina bitarteko badute, nahi izanez gero.

Pantaila aurreko egotaldi asaldatuan, solaskideen jarduna ulertu nahian, bi hipotesi etorri zaizkit burura: 

1- Ez dakite auziari buruz zipitzik ere. Beraz, beste gai askorekin bezala ahora etorri ahala ari dira iritziak botatzen.

2- Jakin beharrekoa badakite, baina euren Espainia sakratua defendatzeko helburuak, bitarteko irregular denak onartzen ditu.

Lehenengoa kezkatzekoa da, baina bigarrena izutzekoa.Eta zinez uste dut, bigarren helburu horrekin ari zirela euren jarduna eraikitzen.

Horrek argi erakusten du, ezker eta eskuin bat eginda daudela Espainian, Euskal Herriari albo guztietatik oztopoak jartzeko.

Kazetariek solasean jarraitu dute epaiaren zoriona ospatzen, eskuin usaineko iritziemale bibote-estu batek, esan duen arte: "Baina honek ondorio politikoak izango ditu!". Une batez, pentsatu dut: "Kontxo! badator zentzuzko zerbait esatera".

Hurrengo esaldiak segituan jarri nau lurrean. Esaten ari zen, EAJ eta EAko oso buruzagi esanguratsuak auzipetuen alde agertu direla, eta haiei ere, nolabait, ordainarazi beharko litzaiekeela.

Eta atzetik, bertan planteatu ez diren galderak etorri zaizkit bata bestearen atzetik:

- Eta eurei, etorriko al zaie inoiz ondorio politikorik egiten dituzten astakeria juridiko/politikoengatik?

- Inork jarriko al dizkie neurriko zapatak?

- Inoiz konturatuko ahal dira hainbeste goraipatzen duten demokraziatik urrun daudela, oso?

Eta garrantzitsuena:

- Inoiz konturatuko al gara, euskaldunok elkarrekin ez bada, denok onartu ahal ditugun estrategiekin ez bada, egurra ematen jarraituko dutela eta ez dugula inoiz burua altxatzea lortuko?