Dwipada Pitham eta asana konpentsatzaileak

---

---

Namaste.

Gaur azaldu behar dugun asana 3 izen ezberdinekin ezagutzen da:

Dwipada Pitham: bi hankako mahaiaren asana.

Setu Bandhasana: zubiaren asana.

Setu Bandha Sarvangasana: zubiaren asana.

Sankritozko hitz hauek honela itzultzen dira:

Dwi: bi

Pada: oina, hanka.

Pitha: asana

Setu: zubia.

Bandha: euste, euskailu, lotura.

Sarva: dena, osoa.

Anga: gorputza, gorputzaren zati.

Gorputz jarrera hau alderantzikatua da, burua bihotza baino beherago gelditzen delako. Asana hau, zehazki, erdi-alderantzikatua da, hankak behean gelditzen direlako. Asana alderantzikatu peto-petoa Sarvangasana litzateke (aurrerago ikusiko dugu).

ASANARA IRISTEKO JARRAIBIDEAK

• Gora begira etzanda gaudela, belaunak tolestu eta oinak lurrean jarri ipurditik hurbil.
• Besoak gorputzaren bi alboetara eta eskuak lurrera begira errain-hezurretik (sakroa) hasita bizkarra ornoz orno igoko dugu. Horretarako indarra oinetan eta ipur-masailetan bilduko dugu. Oinek lurrerantz eta ipur-masailek goruntz egingo dute indarra. Orekan. Izterrek, abdominalek, ingleek,... ere parte hartzen dute, noski.
• Beraz, arnasa hartuz, lehenengo mugimendua gerria edo lunbarra lurrean jartzea izan dadila eta ondoren hasiko da errain-hezurra eta bizkarrezur osoa lurretik altxatzen. Ahal dugun punturaino.
• Arnasa botaz atzera bidea egin, ornoz orno bizkarrezur osoa lurrean jarri arte.
• Hasieran, arnasari jarraituz, era dinamikoan egingo dugu asana hau (3-4 aldiz). Praktika pixka bat hartuta daukagunean, bizkarrezurra goian dugunean arnasketa batzuz geldituko gara era estatikoan (3-4 arnasketaz).

ALDAERAK

• Arnasa hartuz bizkarrezurra igotzen dugunean besoak eraman ditzakegu zuzen atzera lurreraino. Arnasa botaz, besoak aurrera etorriko dira lehengo lekura bizkarrezurra lurrean jartzen dugun bitartean.
• Era estatikoan gaudenean eskuak gerrian jarri daitezke eta ukalondoak lurrean bizkarrezurrari gorago igotzen laguntzeko.
• Pixka bat zailago: era estatikoan gaudenean eskuak elkargurutzatu daitezke lurrean, ukalondoak zuzen jarrita.
• Asana hau erraz egiten duenak zailagoa egin nahi badu Eka Pada Setu Bandha Sarvangasana egin dezake, esanda bezala era estatikoan dagoenean hanka bat goruntz altxatuta (ondoren beste hankari eman txanda).

KONTUZ

• Ez egin indar guztia ipur-masailekin. Ipur-masailek eta oinek egiten duten indarra orekatuta egon dadila.
• Kontuz, bizkarreko, lepoko, buruko edo sorbaldetako mina baldin badaukazu.

ONURAK

• Asana erdi-alderantzikatua denez odol fluxua burura hobeto iristen laguntzen du. Burua frexkoago eta ideiak garbiago izateko.
• Ipur-masailetako, izterretako, abdominaletako muskuluak indartzen ditu.
• Eserita denbora gehiegi pasatzearen ondorioz jartzen zaigun gorputz jarrera itxia zuzentzen du.
• Lepoa luzatzeko balio du.
• 3 txakratan dauka eragina: Muladhara (sustraiekoa), Anahata (bihotzekoa) eta Vhisuddha (eztarrikoa).

ASANA KONPENTSATZAILEA

Zer da? exijentzi haundiko asana bat egin ondoren gorputza orekatzeko egiten dugun asana da asana konpentsatzailea. Exijentzi haundiko asana bat egiten dugunean, oso onuragarria izaten da, atzetik, gorputza orekatzen lagunduko duen asana konpentsatzaile bat egitea. Adibidez, gerria aurreraka makurtuta izan badugu denbora askoan, ondoren, xuabeago, atzeraka makurtzea litzateke onuragarriena.

Kasu honetan, Dwipada Phitam Halasanaren asana konpentsatzaile ona da, baita Uttanasanarena ere. Halasana, goldearen gorputz jarrera, aurrerago ikusiko dugu.

Dwipada Phitam-en asana konpentsatzaileak hauek izan daitezke: Apanasana (gorputza bilduta jartzen dugun gorputz jarrera da) edo Jathara Parivartanasana (etzanda gaudela, sabelaldea ezker eta eskubira jiratzean datza). Hauek ere aurrerago ikusiko ditugu.

Om shanti shanti shanti