Bhujangasana

Namaste.

Ahuspez etzanda eta eskuekin lagunduta burua eta bizkarrezurraren goiko aldea altxatuta ditugula lortzen dugun gorputz jarrera da Bhujangasana.

Bhujanga-k sugea esan nahi du eta asanak gorputz jarrera, beraz, sugearen gorputz jarrera da. Kobraren asana bezala ezagutzen da orokorki.

ASANARA IRISTEKO JARRAIBIDEAK

• Lurrean ahuspez etzanda jarri. Hankak zuzen, guztiz elkartu gabe, oinbularrek, izterrek eta pubisak lurrerantz egiten dutela. Eskuak bi alboetara sorbaldak baino beheraxeago jarrita eta ukalondoak gorputzaldera zuzenduta.
• Arnasa hartuz, eskuak lurrean ondo bermatuta, besoak luzatzen hasi burua eta bularraldea igotzeko. Ipurmasailak sendo baina behartu gabe.
• Besoak luzatzen jarraituko dugu, bakoitzak bere neurria hartu behar du, baina besoak guztiz luzatu gabe. Sorbaldak belarrietatik urruti mantendu eta bularrezurra igo,bizkarrezur osoaren kurbatura eginez (ez tolestu gerrialdean bakarrik, hor da errezen, baina, sorbalda-hezurren artean kurbatura ere egiten dugula ziurtatu).
• Arnasa botaz lurrera itzuli emeki emeki.
• 3 arnasketaz egin mugimendua jarraituz eta ondoren asana mantendu 3 arnasketaz. Denborarekin arnasketak gehituz joango gara.

LAGUNGARRI IZAN DAITEKE

• Bhujangasana gogorregia iruditzen bazaigu esfinjearen asanarekin hasi gaitezke jarrera honetara ohitzen. Horretarako ahuspez etzanda jarri lurrean. Hankak zuzen, guztiz elkartu gabe, behatz puntek, izterrek eta pubisak lurrerantz egiten dutela. Burua eta bizkarrezurraren goiko aldea altxatu eta ukalondoak jarri lurrean sorbalden azpian. Eskuak aurrean jarri, esku ahurra lurrerantz. Hor mantenduko gara, betiere bizkarrezurraren kurbatura orokorra eginez, sorbalda-hezurren (omoplato) artean fijatuz batez ere eta gerria gehiegi behartu gabe. Belarriak eta sorbaldak urruti mantentzen saiatu.
• Bhujangasana era dinamikoan egin, era estatikoa aurreragorako utziz.

KONTUZ

• Bizkarreko lesioekin, poliki egin aurrera.
• Lepoko mina baduzu burua tente mantendu, ez kurbatu atzeraka.
• Gerriko mina baduzu, proba ezazu ipurmasailak gehiago estutzen edo hankak pixka bat zabalduta.
• Eskumuturretako mina baduzu, esfinjearena egin edo Bhujangasana eskuak erabili gabe.
• Haurdun bazaude, ez egin asana hau.

ONURAK

• Besoak eta bizkarreko muskuloak indartzen ditu.
• Muskulu abdominalak luzatzen ditu (muskulu indartzea bezain garrantzitsua da luzatzea ere).
• Hileroko minak baretzen laguntzen du.
• Gure gorputzaren jarrera hobetzen du. Gorputza tente eta erne mantentzen laguntzen digu eta honek, era berean, buruko jarrera positibo eta gogotsua bultzatzen du, gure energia maila hobetuz.
• Bihotza irekitzeko oinarrizko asana da, besteekiko konektatzen laguntzen diguna.
• Beldurra gainditzen laguntzen digu.

Om shanti shanti shanti