Ohar entziklopedikoa

Irakurle: ohar hau idazten dizut zure liburutegiko apalik luzeena gorde dezazun, bizitzaz idatziko dudan entziklopedia bertan jartzeko.

Kalkula ezazu zortzi tomo izango direla, baina, haiek irakurrita oraindik zalantzaren bat geratzen bazaizu, ez zaitez artegatu, zeren beste horrenbeste liburuki idatziko ditut, bizitza zer den argi gera dadin zure liburutegiko arasan. Beraz, badaezpada, jar ezazu ohar hau apalaren erdialdean, ezkerrean zortzi tomo eta eskuinean beste zortzi jarri ahal izateko.

Ohar entziklopedikoari buruzko oharra:

Idazleak bizitzaz idatzi behar zuen entziklopedia idatzi gabe geratu zen, eta hura erosteko izena eman zuten erosleen apal luzeak hutsik geratu ziren. Edo ia hutsik: erdialdean, idazleak idatzitako ohar txatxarra ageri zen, ezkerrean zein eskuinean apalaren hustasuna nabarmentzen zuela. 

Eta, hain zuzen ere, ohar txatxar hark erakusten zuen argien zer den bizitza liburutegiko apal ia huts hartan.

Bernardo Kapanaga