Nire maitasun porroten alfabetoa

---

Arantzak bihotza ziztatu zidan lehen ezetzarekin

Bihotzi bihotzerrea eragiten omen nion

Concha maskor itxia izan zen beti niretzat

Domekak esan zidan berarekin jai nuela

Eguzkiñerentzat ni eklipse bat bezalakoa nintzen

Fatimak zera esan zidan: mirariak Lourdesen!

Garbiñek zikin jokatu zuen nirekin, plantatuta utzi ninduenean

Haizea basamortuko sirokoa bezain hotza zen nirekin

Iragarnek ez ninduen ikusi nahi ezta iragarkietan ere

Jaione oso iaioa zen ni sufriarazten

Korok ez zidan kantatzen utzi bere maitasunen abesbatzan

Lorearentzat ni plastikozko lilia nintzen

Maitederren gorrotoak nire bizitza itsustu zuen

Nekane hasi orduko kantsatu zen nirekin

Oihana erre egin zen nire txorakeriekin

Pizkunderen bihotza itzalita topatu nuen

Querubinak infernuko aingerutzat hartzen ninduen

Rocioren ukoagatik begiak ihintzez busti zitzaizkidan

Saioarekin lehen saioan geratu nintzen K.O.

Trinitate konkistatu? Ezta aitaren, amaren eta izpiritu sainduaren laguntzarekin ere!

Usoa ezin izan nuen sekula ere ehizatu

Victoriaren bihotza ezin izan nuen egundo ere bentzutu

Xixilirengatik xurrutera jo nuen, xoxo hutsa nintzela xuxurlatu zidanean

Zorionek munduko pertsonarik dohakabeena egin ninduen

 

 

Zigor Andia