Itzultzea

---

Orain,

hegazkinen isatsetan kamerak jartzen dituzte.

Hegazkin barruan jesarrita zoazela,

nola aireratzen den ikus dezakezu telebista-pantailan,

nola altxatzen den zerurantz

Buenos Aires azpian utzita.

Eta hegazkinak gurutze itxura du,

gurutze erraldoi hegalaria.

Gaua  da,

eta, pantailan,

hegazkinaren argi dardarkariak gurutzearen bihotza dirudi,

metalezko hegazti erraldoia airera dadin,

hegan egin dezan

beharrezkoa den bihotza.

Keroseno-taupadei esker goaz aurrera,

hegotik iparrera,

hemisferiotik hemisferiora.

Eta, bidaia horretan,

zeure burua arrotza da,

bidaia bueltakoa baita.

 

Bueltako bidaiak arriskutsuak dira,

zure jarlekuan ezezagun bat doalako

eta

lurreratzean topatuko duzuna ere

ezezaguna izango delako.

Bueltako bidaietan,

bihotz ezezagun batek egiten du taupa bularrean

eta bizitzaren orratzak

ez du iparrik,

ilargiak gobernatutako belaontzia dirudi.

Goialde honetatik,

bihotzaren taupadak argizarizkoak dira,

itzultzea ezinezko bidaia baita,

iraganera joan nahi izatea

bezain ahalegin antzua,

eta salbazioa,

zerutik hain gertu gauden ezleku honetan,

inoiz baino urrunago dago,

itzultzea kontinente galdua baita beti.

 

Ron Sniakin