Heriotzaren aurretik

Janari merkea da gezurra

nork bere burua justifikatzeko bada.

Eroso bizi gara autoengainuaren lokatzetan,

garrantzitsua itxura zoriontsua da.

Ederra da gainbehera

zimurrik gabeko aurpegian ezkutatzeko

beste diru baldin badugu.

Porrota ez da berriro xarabe mingotsa izango,

beti dago-eta modua

hauteskunde gauean garaileak izateko.

Berdin dio zenbat maitezaitut isuri behar ditugun

(bankarien irribarreak bezain egiatiak)

egunerokokeriak ugertutako eskuburdinak

urrezko eraztun moduan agerrarazteko

bezain trebeak bagara.

Horrela joaten zaigu bizitza eskuetatik,

eguneroko gezur horiek guztiak jatea

porrotik mingarriena dela ukatuz:

nahikoa da ispilua ganbaran gordetzea

eta komenigarritasunaren jantzian bizitzea.

Eta aurrera goaz,

gure miseriatik milimetro bat mugitu gabe,

gezurraren lokarriak hausteko beldurrez,

askatasuna lurralde deserosoa da-eta.

Baina ez gaitezen engaina:

norbaitek esan zuen bezala,

hemen garrantzitsua ez da

ea bizitzarik dagoen heriotzaren ostean,

ezpada

ea bizitzarik egon den

heriotzaren aurretik.

Ron Sniakin