Egunerokotasuna

---

Bost urte pasatu dira

edo hamar edo hogei

eta goiz batean bat-batean

dena zalantzan jarri duzu.

Zer egiten dut hemen pertsona horrekin.

Huskeria batek bota ditzake zuen artekoa

komuneko zulotik.

Zer ordu da, galdetu diozu

eta ez dizu erantzun:

hainbeste urteren ostean

mugikorra izaki erakargarriagoa zaio, antza.

Elurra bezain geldo sentitu duzu etsipena

bihotzean mara-mara.

Bizitako guztia komuneko zulotik botatzea

urteetako etsipena komunetik behera

botaka egitea.

Zeure burua imajinatu duzu besaulkitik altxatzen

eta zauden moduan kalera irteten

bueltako giltzarik gabe.

Joan, urrundu, alde egin.

Hainbeste urte atzean utzi

urrats bakoitzean urrundu.

Baina besaulkian zaude

bost,  hamar, hogei urtean sakondutako erosotasunean eroso

eta erabaki duzu dagoeneko ez duzula erabakitzeko ahalmenik.

Ron Sniakin