TXINGUDIKO AHT GELDITU!! ELKARLANA AZKENEKO GERTAKARIEN HARIRA

---

Excavacios Ugarte S.L. enpresak AHTren eraikuntza lanetan parte hartu du, Legution eta Arrazua/Ibarrundia udalerrietan, Altuna y Uriaren enpresaren azpi-kontrata gisa. 

Abuztuaren 23an, AHTren eraikuntzaren aurkako hainbat lagunek salaketa ekintza baketsua egin zuten enpresa horrek Irunen dituen bulegoetan.  

Txingudiko AHT Gelditu Elkarlanak! bere gain hartzen ditu sinatzen dituen ekintzak eta agerkariak. Egiten dugun lana jendaurrekoa da, eta gure jardueraren inguruko informazioa http://www.blogak.com/txingudiahtez web orrian eskura du interesa duen edonork. 

Irunen, AHTren aurko ekintzaileek Excavaciones Ugarte S.L.ren jarduna salatu dute. Ekimen horrekin bat egiten dugu. Horretarako, bi pankarta eta kartelak jarri zituzten, batetik, eta bestetik, parodia egin zuten Irungo merkatuan, eta herritarrei esku-orriak banatu zizkieten. Material hori guztia bildu dugu. Kontsulta egin nahi duenak eskatzea besterik ez du. 

Excavaciones Ugarte S.L.k Txingudiko AHT Gelditu! Elkarlaneko helbide elektronikora mezua bidali zuen. Bertan dioenari jarraiki, abuztuaren 23ko protesta ekintzaren ondorioz AHTren eraikuntza lanetan ez segitzea erabaki zuten.  

Horren harira, gure balorazioa baikorra da: 

• Herritarren jendaurreko salaketa ekintza baketsuen bidez egitasmoa geldiarazi daitekeela erakusten du.

• AHT egitasmo inposatua da. Gure lurra, gizartea, ekonomia eta kultura babestu behar ditugu tamainako erasoaren aurrean. Horregatik, egitasmoaren bultzatzaileen jarduna publikoki salatzen segituko dugu.

Horrez gain, gure helbidean Excavaciones Ugarte S.L.ren mezua jaso genuenetik enpresa horren jardunaren aurkako salaketa publikoa eten dela nabarmendu behar dugu.  

Intoxikazioa eta amesgaizto kriminalizatzailea: 

• Excavaciones Ugarte S.L.k eraikuntza lanak uztea “mehatxu terroristen” ondorioa dela zabaldu zuten ABCk eta Antena 3ek. Gertaerak desitxuratu eta informazioa manipulatu dute, helburu argi batekin; AHTren aurkako eta lurraren aldeko oposozio legitimoa kriminalizatu nahi dute.
• Alegiazko gertaera horren gainean eraiki dira gerora errenkadan egin dituzten elkartasun adirazpenak; Irungo PNV, Santano, PP, Adegi, Eusko Jaurlaritza…

Gauzak horrela, Txingudiko AHT Gelditu! Elkarlanak honako hau adierazi nahi du: 

• Ingurumenarentzat eta herritarrentzat benetako mehatxua AHTren inposaketa da. 
  

• AHT geldiarazteko konpromisoa, eta, ekonomia, gizarte eta garraio eredu orekatu baten aldekoa, berretsi nahi dugu.

• Helburu horiek lortzeko orain arteko bideari eutsiko diogu:

• Informazioa eta sentsibilizazioa.
• Herritarren parte hartzea.
• Ekintza publiko baketsuak.
• Desobedientzia zibila.

  Sinistuta gaude gizarte aldaketa lor daitekeela bide paketsuak jorratuta. Horren alde egiten dugu, eta ez dugu inolako asmorik eztabaida antzu eta interesatu batean sartzeko; ez gara joko maltzur horretan eroriko.  

Euskal Herrian milaka Ha dinamita erabiliz txikituko dituen egitasmoa sustatu eta txalotzen dutenek bortizkeria zale gisa aurkeztu nahi gaituzte.  

Benetako eztabaida soziala desbideratu nahi badute ere, orain arteko lanarekin jarraituko dugu.  

Herritarrak deitu nahi ditugu datozen egunotan egingo ditugun mobilizazioetan parte hartu dezaten. 

Txingudiko AHT Gelditu! Elkarlana