AGERRALDI PUBLIKOA

Goizeko 11:12etan, Irungo Renfeko geltokitik aldiriko trena hartu dugu AHT Gelditu! Elkarlaneko kideok, eta prentsaurreko-parodia egin dugu Irundik Oreretara doan tartean. Ekintza honen bidez, egitasmo suntsitzaile honen inguruan dagoen informazio eza salatu naiz izan dugu, eta behingoagatik, gelditu dezatela esijitu. Geltokiko buruak AHTren bultzatzaile diren insituzio eta alderdien jarrera salatu du, eta egitasmoak eragingo lituzkeen eragin kategarrien berri eman die bidaiariei.

Bereziki Txingudi alde honetan eragin lazgarria du garraioaren hazkundearen etengabeko logikak, eta hori ere salatu nahi izan dugu. AHT logika horretan areagotzea dakar. Bukatzeko, herritarrei jarrera aktiboa hartzeko deia egin dugu.

Honekin batera, ekintza honetako argazkiak eta agerraldiko testua bidali dizkizuegu. Oreretatik Irunako bueltan, ekintza errepikatu dugu, eta ederki joan da dena.

AHT GELDITU!
GURE ESKU DAGO!
TXINGUDIKO AHT GELDITU! ELKARLANA

Irakurritako komunikatua

Egun on denoi: 

Ongi etorriak eta eskerrik asko gurekin bidaiatzeagatik. Enpresa honetako ordezkari naizen aldetik zuen ongizatearen erantzule ere banaiz, eta bidaia ona izango duzuela espero dut. 

     Zuen baimenarekin, Abiadura Handiko Trenaren eraikuntzari buruzko hainbat kontu aipatuko dizkizuet. Izan ere, egitasmo horrek eragingo dituen izugarrizko kalteak ezagutzeko eskubide osoa duzue, eta etengabe, funtsezkoa den informazioa ukatzen ari digute. 

      “Euskal Y” izeneko egitasmoak ez die erantzuten aldiriko zerbitzu honen erabiltzaileen benetako interesei. Hiriburuen arteko bidaiak egiten dituztenei baino ez die mesede egingo, eta bidaia guztien % 3 da soilik mota horretakoa. Joan-etorrien %97 herri eta eskualdeen artean egiten dira. Ingurumenean eta ekonomian hainbesteko kaltea onar al daiteke? Joan-etorrien %3 horrek justifikatzen al du tamainako txikiziorik?  

     AHTren ohiko erabiltzaileen soslaia bestelakoa da. Enpresariak, politikariak eta enparauak izango dira onuradun nagusiak. Hortaz, gutxiengo batek erabiliko duen azpiegitura erraldoia nahi dute eraiki, denon diruarekin, eta sekulako kalteak eraginda ingurumenean. Gehiengoak beharrezkoak dituen garraio zerbitzuentzako, berriz, eskas da inbertsioa. Horrek, noski, badu bere isla kalitatean, maiztasunean, segurtasunean, etab. 

     AHTren kostua ikaragarria izango da, 9.000 milioi €-koa. Ez izan inolako zalantzarik gastu horrek aldiriko zerbitzu honengan eragin kaltegarria izango duela. Garraio publikoak ez du diru iturririk izango urte luzeetan. Era berean, aurreikusi dezakegu benetako premia sozialentzako gastu publikoa nabarmen murriztuko dela, edo ez dela haziko beharren neurrian, hezkuntzan, osasunean, etxebizitzan, gizarte laguntzan, etab.  

     Herritarrentzako egiten dut lan, eta euren premiei benetan erantzungo dien zerbitzu publikoaren aldekoa naiz. Benetako beharrizanei, orokorrei eman behar zaie erantzuna. Egitasmoaren bultzatzaileek denon mesederako izango dela esaten dute, baina epe motzeko interes partikularrak dituzte gidari. PSOE eta PNV alderdiek erkidegoaren garapena ahotan dutenean, gutxi batzuk lurra txikituz beste batzuen bizkar aberasteaz ari dira. Egundoko etekinak aurreikusten dituzte, eta orain leial jokatuko dute babestu eta aupatu dituzten eraikuntza enpresa eta harrobiekin. Negozio borobila baino ez dute burutan, eta gainerakoak eurei bost. 

     AHT bultzatzen duten alderdi eta erakundeen arabera, kamioi gutxiago ibiliko da errepideetan, eta trafikoa arinduko da. Euren aurreikuspenen arabera, eguneko 1.000 kamioi gutxiago ibiliko da. Beste behin ere, ezinbesteko informazioa ezkutatzen digute. Biriatutik eguneko 10.000 kamioi pasatzen dira, eta hazkunde maila honekin segituz gero, 2015ean, 15.000 pasako dira. Horrela nekez arinduko da errepideetako trafikoa. Aitzitik, mugagabeko hazkunde honek arazoak areagotuko ditu aurrerantzean, eta dagoeneko, nahikoa kezkagarria da egoera. Gauzak horrela, zenbat AHT beharko lirateke errepide bidezko merkantzien garraioa murrizteko? Ba al da nahikoa lur horretarako?  

     Iinformazio eza agerikoa da. Gure erabiltzaileek, eta, herritarrek oro har, ez dakite deus AHTri buruz. Informazioa ematea erakundeei dagokie, baina behin eta berriz ukatu egin digute eskubide hori. Berriki egindako ikerketa soziologiko batek argi erakutsi du herritarren %1ek baino ez duela zuzeneko informazioa jaso erakundeen aldetik. Baldintza hauetan herritarren parte hartzea eta eztabaida soziala ezinezkoak dira, eta horren erantzule dira egitasmoaren sustatzaileak, erakundeak zein alderdiak.  

     Ikerketa horrek utzi du beste ondorio aipagarririk. Zenbat eta informatuago egon (batez ere egitasmoa zalantzan jartzen duten taldeen lanari esker), orduan eta nabarmenagoa da aurkako jarrera. Hainbat eta gehiago jakin AHTk ingurumenean, gizartean eta ekonomian eragingo dituen kalteei buruz, orduan eta nabarmenagoa da iritzi kritikoa. 

     Horregatik guztiagatik, bidaiariok, ez izan aktore pasibo. Informa zaitezte, gaia aztertu, eta har ezazue jarrera aktiboa. Denon esku dago erokeria gelditzea!! 

Irunen, 2007ko ekainaren 23an