Gorka Ovejero Berria egunkarian on-line elkarrizketatuta

Gaur goizean Gorka Ovejero Berria egunkariko bulegoetan egon da, argazkian ikusi dezakegun bezala, irakurleen galderak erantzuten on-line. Galdera gehienak desobedientzia zibilari (DZ) buruzkoak dira, Barcinari tartakadak bota eta Auzitegi Nazionalak bi urteko espetxe zigorra ezarri ondoren. Hemen uzten dizkizuegu Gorkaren erantzun guztiak, Berriako webgunetik hartu ditugunak. Lehen galderak behean daude, baina berdin zaizu egin diren ordenean edo alderantziz irakurtzea.

12 G. Honenbestez, amaitu da elkarrizketa. Mila esker Gorkari eta parte hartu duzuen guztioi. Berria.info.

E. Eskerri asko zuen galdera eta interesengatik. AHTren aurkako borrokan jarraituko dugu DZ ahalik eta era koherenteenean burutuz. AHTrik Ez! Ez hemen Ez inon!!

11 G. Aupa.Epaiketaren kontuarekin ematen du berezko arrazoia bidean gelditu dela eta ekintzak hartu duela protagonismoa, hau da, AHTa sarraskia dela alboratu eta tartazoak dira mintzagai. Nola egin aurre herri mugimendutik medioek sortzen duten zurrunbilo horri?Animo!! Itziar.

E. Bai hala da, komunikabide nagusiek tartakaden auziari eta zigor eskaeren neurrigabetasunari heldu diete AHTren borroka bigarren, hirugarren mailan utzirik. Mugituren hastapenetatik, ekintzen helburu nagusiak AHTren gaia mahaigainean jartzea izan da, baina hori ez da beti posible. Komunikabide alternatibo, euskaldun eta jatorretan, AHTren aurkako mezua emateko denbora eman digute eta interesa erakutsi dute. Beste askotan aipatu ere ez. Guk beti AHTren aurkako mezutxoren sartzea saiatu gara toki guzietan.

10 G. Egia aurretik daramaten azken mohikanoak ez al gara izango? Nola egokitu desobedientzia zibila kode berriaren garaietara? jexustxu.

E. Borroka armatua muturrera eraman duten euskaldunez inguraturik gaudenez, gure borroka ia-ia haurren jolasa ematen du. mohikanoak garenaren sentsazioa geroz eta gehiago badugu, AHTren aurkako borrokan geroz eta jende gutxiago gabiltzalako izanen da. Kodearen aldaketari dagokionez, oraindik ere bide parlamentario luzea gelditzen zaio eta Europatik ere toketxo bat eman diete. Ikusteko dago beraz, zertan gelditzen den, eta horren arabera ekintza motak egokitu beharko ditugu. IRUDIMENA ZABALDU!!

9 G. Aupa Gorka! Itoitzeko kable mozketaren kasuan guarda 5 minutuz lotzeagatik etorri zen gartzela, zuen kasuan tarta jaurti ordez "estanpatu" omen zenituztelako: ekintza zuzenetan den dena ezin da aurreikusi, eta sistemak beti topatuko du zirrikituren bat, baina plangintzari eta entrenamenduari zein garrantzia eman behar zaiola uste duzu? Animo! Iñaki.

E. DZan barneratzeko ondorio juridikoak garbi izan behar dira. Ezin duzu pertsona bat ekintza batera eraman honi ondorioak zein izanen diren ongi azaldu gabe. Jendeak ondorioak ongi baloratu eta haiek onartzeko prest egon behar du, bestela pertsona horren militantzia eta agian egoera pertsonala ere, pikutara joanen da. Hau guzia esanik ere, ekintza batzuk burutzea ezinezkoa izanen zen jazarpena zein izanen zen jakin izan balitz. Nik beti esaten dut: EKINTZA BAT BURUTU AURRETIK ABOKATU BATEKIN HITZ EGIN BEHAR DA, BAINA EKINTZA BATZUK SOILIK AURRERA EGIN DUTE ABOKATU BATEKIN HITZ EGIN EZ ZELAKO. DZren bidean sartzea estatuen aurka zuzen sartzea da eta honek bere ondorioak dakartza. Horren kontientzia izan behar dugu beti. Mugitu!k hainbat ikastaro desberdin burutu ditu honen inguruan, abokatuekin, KEMeko lagunekin, beldurrari nola aurre egin ikasteko...

8 G. Merenge frantsesa gogorra omen da, Barcinak berak esan zuenez. Non erosi zenituzten tartak? nola sartu zenituzten ekitaldira? Zorionak! Irantzu.

E. Hainbestetan esan dugun moduan, merengea euskalduna zen eta ez frantsesa. Horregatik euskal gozogileen babesa bilatzen ari dugu, beraien ofizioaren defentsa egin dezaten, kar kar kar. Noel Godin belgiarra, tartakaden asmatzaileak dioen moduan, tartak gozoak eta tokikoak izan behar dira, ekintza burutzerik ez baduzu, hauek jan behar dituzulako. Guk Donostian erosi genituen..... Ekintzaren nondik norakoak hitzaldietan eta talde txikietan esaten ditugu... Tartakaden bat egitekotan bazabiltza gure esperientzia zurekin partekatuko dugu gustora Irantzu. [Blog honean kriston artikulu polita dago tartak botatzeko historiari buruz: Eta nondik dator tartak aurpegian botatzeko kontu hori?].

7 G. Kaixo Gorka! Zigor eskaerak aintzat hartuta, bi urteko zigorrak lasaitu ala haserretu egin zaituzte? Besarkada bat, Miren U.

E. Auzitegi Nazionalean epaitzen gintuzten euskaldunak izanik, bi urteko kartzela zigorra lasaitzeko modukoa izan zen, guk oso argi baikenuen absoluzioa ezinezkoa zela (juridikoki balizkoa baina politikoki ezinezkoa) eta 4 urteko kartzela jasoko genuela ziur geunden. Duda bakarra zera zen, aringarri bat jarriko ote ziguten kartzela sahiesteko edo ez. Azkenean erabaki politiko hutsa izan den epaia jaso dugu. Espainiako Erreinuak gu epaitzeko jurisdikzioa baduela berretsi dute, gure ekintza atentatua izan zela berretsi dute, gu izan ginela frogatutzat eman dute eta azkenik, frantziar Estatuan zabaldu zuten ikerketa "epaituriko kausa" bezala hartzerik ez zegoela erabaki dute. Hau da, gure defentsako argudio guziak ukatu dituzte eta fiskaltzarenak onartu. Horrekin, 6 urte, edo 5, edo 4 bota ziguketen, eta hala egin dute: 4 urte bota dizkigute eta aringarri bezala Frantzian egin izana baliatu dute bi urtera jeisteko. EZ GAITUZTE KARTZELARATU NAHI IZAN.

6 G. EGIN AURRETIK NEURTU AL ZENUTEN EKINTZA, AZTERTU ALDEKO ZEIN KONTRAKOAK¿? ETA NAFARROAKO "ESKUIN BAT ETA BAKARRAK" NOLA ERABILIKO ZUEN MEDIOETAN ZUEN EKINTZA SANMARTINI.

E. Toulousen egonen zen euskal agintari bakarra Barcina anderea izanen zela baieztatu ondoren, honek Nafarroan izanen zuen ohiartzuna neurtu genuen bai, baita frantziar Estatuan tartakatze politikoak ekartzen zituen ondorioak. Toulousen abokatu bat genuen atxilotzen gintuztenean gure defentsa eginen zuena. Kontua da atxilotu beharrean aretotik bota gintuztela, besterik gabe. Eta gero geroko guziak.

5 G. Egun on Gorka, Mugitu!-k eta AHTaren aurkako erreibindikazioek oihartzuna izan zuten zuen ekintzaren bidez. Zein estrategia eta protesta molde darabil gaur egun mugimenduak AHTari kontra egiteko? mila esker! Xabi.

E. AHTren lanak hasi baino lehen, informazioa zabaldu, hitzaldiak eman, mendi martxak burutu, herri galdeketak egin... gisa horretako lanak egin izan ditugu. Behin lanak hasita, DZren aukera baino ez zaigu gelditzen. jakina, DZ ekintzak lanak hasi aurretik ere burutu ziren, zundaketen lur laginak apurtur, mugarri topografikoak lurretik ateraz, desjabetzak geldiaraziz... baina behin lanak hasita, DZren hautua ardatz nagusi bilakatzen da. Gaur egungo estrategiari dagokionez... internetez hitz egiteko gaiak ez dira, kar kar kar. Esanen dizuegu dena den, orain prozesu hau bukaturik, eta kendu dizkigun indarrak berreskuratu ondoren, borrokaren inguruko hausnarketa orokorra egin beharrean gaude DZan sakontzen jarraitzeko.

4 G. Epaiketan, tartak bota izana ukatu zenuten. Zergatik jo zenuten estrategia horretatik? Hitz egin zenuten epaiketan desobedientzia zibilaren defentsa irekia egiteaz? Ongi izan. Intza.

E. Hori izan da kontzientzia arazo gehien sortu diguna! Gure abokatuen defentsa estrategia izan zen, denbora faltagatik haiekin ongi eztabaidatu ezin izan genuena. Harrigarria da bai bi urtez ekintza ukatu gabe aritu ondoren epaiketan horixe bera egitea. Laburki esanda, gure lekuko gehienak atzera bota zituzten. Frantziar Estatuan Katedradun batek egin zigun txosten juridikoa (tartakaden ingurukoa) atzera bota ziguten, beste hainbat froga eskaera ere ez zizkiguten onartu.... Eta era berean, fiskaltzak ez zuen behar bezalako ikerketa lana egin gu inkriminatzeko. Hori guzia ikusirik, gure abokatuek egiletza edo autoria dudatan jartzea ildo garrantzitsua zela erabaki zuten. DZren ikuspegitik dena den, ez da erabakirik koherenteena, baina Auzitegi Nazionaleko epaiketa fartsa hutsa izan zen eta gu beraien mailan jarri ginen.

3 G. Orain zigorra zein den jakinda, berriz egingo zenuke gauza bera?

E. Askotan egin digute galdera bera..... eta beti gauza bera erantzuten dut. Baietz erantzun nuen foruzainek askatu nindutenean, baietz Auzitegi Nazionalera deitu gintuztenean eta baietz epaiketa bukatu zenean. Eta gartzelan bukatu izan bagenu, fiskaltzak eta Barcinak helegitereki jarriko ote duten oraindik ez dakigu, gartzelatik aterata gauza bera esan ahal izatea gustatuko litzaidake.

2 G. Kaixo Gorka! Kontuan hartuta Errioxa, Landak, Lapurdi, Araba, Bizkaia eta Gipuzkoan AHTak inposatuak izan zirela ere, zergatik ez zen halakorik gertatu San Alonso, Iñigo Urkullu eta Alain Roussetirekin? Ondo izan! Joseba.

E. Ekintza burutu genuen unean, 2011ko urrian, Patxi López zen zuen lehendakaria eta ez Urkullu. Gauza jakina da, hitzaldietan hala esan baitugu, gure helburua EHren AHTren ordezkari gorena zela... eta Patxi López ez zen Okzitaniako Tolosara joan.

1 G. Aupa Gorka! Galdera orokor bat; ikusita zuei ezarritako zigorra eta Espainiako Gobernuak bideratutako Herritarren Segurtasunerako Legea, zein aukera ditu desobedientzia zibilak? Jon.

E. Desobedientzia zibilak bide zailak izan ditu beti. Lege honek DZren bidea zaildu eta gogortuko du dudarik gabe, baina DZren indarra legeari barre egitea, ekintza txundigarriak burutzea eta jendartearen babesa lortzea izan dira, batik bat EHn. Gure lana da bide horretan sakontzen jarraitzea.