AHTren aurkako kanpaldi bat antolatu du Etxarriko Gazte Asanbladak

Etxarriko Gazte Asanbladak kanpaldi bat antolatu du Etxarri Aranazko Beheko basoan asteburu honetan. Baso horretatik AHTa pasa litzateke eta horexegatik aukeratu dute lekua akanpatzeko. Guaixe Aldizkariak gazteei egindako elkarrizketa bat argitaratu du:



1. Gaztetxeko lau paretetatik irten eta basora…..
Bai. Beheko basoan kanpaldi bat antolatu dugu asteburu honetan.

2. Baina, zertara zoazte, oporretan edo lanera?
Bietara. Alde batetik, eztabaida eta hausnarketarako gunea izatea nahi dugu, eta bestetik, eta bide batez, ondo pasatzea ere da gure helburua.

3. Zeintzuk dira gaur egungo gazteriaren kezka nagusiak?
Gazteon problematika oso zabala da. Hezkuntza, etxebizitza eskubidearen urraketa, prekarietatea, etab luze bat. Horregatik, gu geuk alternatibak sortu behar ditugu eta bide horretan lanean dihardugu Etxarriko gazteok.

4. Horren adierazle asteburuko ekintza. Zer landuko duzue bertan?
AHT-ren kontrako kanpaldia egitera goaz. Inposatu nahi diguten proiektu horren aurka gaude eta txikizio hori gelditzeko egin behar den guztia egiteko prest gaude.

5. Kanpaldirako leku aproposa aukeratu duzue gainera.
Bai. AHT pasatzen den lekua aukeratu dugu akanpatzeko. Arazoa hemen bertan daukagunez bertatik ezagutu eta ikustea da gure nahia.

6. Eta zer egingo duzue zehazki?
Ostiral arratsaldean abiatuko gara oinez Etxarritik beheko basora. Lehenengo kontua Gazte Asanbladaren plangintza zehaztea izango da. Ondoren etxetik ekarritako afariarekin tripa ondo bete eta AHT-rik ez! altxorraren bila jolasa egingo dugu.

7. “Altxorraren bila” jolas berezia, beraz?
Bai, galderen bidez AHT-ren gaiaren inguruko hausnarketa egingo dugu, mapa zatiak…. Beno…. (ezin dugu aurreratu…) Gauean, suaren inguruan ere ondo pasatzeko aukera izango dugu.

8. Larunbatean berriz, herrira buelta
Larunbat goizean taldeka bildu eta AHT pasatzen den lekuetatik panel informatiboak jarriko ditugu, bidea markatu…. Bueltan herrian bertan manifa-burrunba egingo dugu. Gure aldarrikapena herriak eta udalak ikus eta entzun ditzan.

9. Mugitzen den harriari (gaztetxeari) goroldiorik ez. Ez zarete geldirik egoteko jaioak ez?
Eta hala izan behar du ez? Orain festak prestatzen ari gara buru belarri. Bestalde Gazte Asanbladaren barruan talde antikapitalista bat sortu berri dugu eta lanketa berezi bat egiten ari gara gai horrekin, bideo emanaldiak, hitzaldiak… Azken finean, gaur egun eskaintzen digutenari alternatiba bat bilatu nahi diogu.

10. Etorkizunean, Topagunearen antzera, bi urterik behin akanpada?
Espero dugu urtero errepikatzeko pisuzko arrazoirik ez egotea. Baina hala egin behar bada egingo dugu….Udalak, herritarrek eta alde agertzen direnek argi izan behar dute Etxarriko gazteak ez garela isilduko eta borrokatzen jarraituko dugula.

11. Azken arrazoi bat gaur zuenera hurbiltzeko?
AHT ez dela batzuen arazoa, guztiona baizik. Inposatu nahi diguten eredu horrekin, batzuk gure herriaren kontu aberastu egingo dira eta guk hori ezin dugu onartu. Horregatik, motxila hartu eta gaur denok beheko basue!