BI MINUTU

Logelako argi kamutsean

Adam Zagajewskiren basoan

abesti sortzaile nor den asmatu nahian nabil.

Lakatutako egurrezko ate zuriaren

leihatila itsutik,

egongelaren belunean flash samalda.

Hainbertze okitzen zaituen

iragarkien sail terapeutikoa imajina dezaket.

Cracoviarako trenaren zain,

gaurkoz ostatu hartu beharrean naiz.

Nasako esertoki publikoen

jendetasun artifizialak,

ezin nau lokartu.

Geltokiak,

argi modernoagoak erosi ditu

trenbide herdoilduarentzat.

Urtarrileko lurrunaren besarkada ustean,

berotasunak aurkitu nau.

Kremaz gaztetutako zure eskuak,

ferekaz leun, belazez etzan,

lepaornoan gora dakartzazu.

Ezpain humelak biluztutako sorbaldan,

hortzek haragia estutzen dute.

Bularrak abangoardian,

zure gorputza sentitu dut itsasten.

Hartan,

hitz egin duzu

desirazko berbotsez.

Bi minutu,

besterik ezean,

bi minutu.