KRISIA

   "Krisi" hitzari beldur diogu: Don Bildur txertatzen digute Jaun-Goikoek.

   "Ebaki(a)" esan nahi du grezieraz –greziera(z)ko hitza da–, besterik ez. Batek egiten ditu bere burutazioak imajinaziozko Denbora-Lerroan, eta, bat-batean, HEMENTXE dagoenak –ORAINTXE, beraz– ebaki egiten du gezurrezko Lerro hori, ilusioak deuseztuz (zorionez). Bat bere ebakiak eta erabakiak hartzen zituelako ustean galduta zebilen, eta den-denak (egiatan den-ak) erabakitzen duela nabarmen azaltzen da.

   Aurrean duzunarekin tratutan hasi behar: horixe da 'present(e)' eleak derrana: 'aurrean den(a)'. Jakina, imajinaziozko Lerdodenboran galdua, bilbatzen dituzun asmazio txoroak ere aurrean dituzu nolabait: eta "aurrean" imajinatutako horrek hementxe aurrean duzuna, pare-parean, ez dizu ikusten uzten: eta okerragoa dena, ez dizu sentitzen uzten.

   ‘Presente’-k OPARI ere esan nahi du: oraintxe doan ematen ari zaizuna, aurrean duzuna sentitzeko duzun gaitasunak erakuts dieazazukeena, uzten badiozu. Doan emandakoa (‘doan’, izan ere, latinetik ekarri dugu gurera, eta ‘eman(a)’ esan nahi du) duzu egiazki grazia duena: graziaz emandakoa baita doan (‘gratis’-ek GRAZIAZ esan nahi du), debalde, preziorik ez duena.

   Zure talentuak dira horiexek: doan, graziaz, presente, debalde emanak. Zure talentuak, zure gaitasunak, zure abileziak, zure adrezia, zure ahalmena. Ahalmen hori deuseztu nahi dizute Don Bildur-en bitartez, ahalmenik ez duen Boterearen mende jar zaitezen, saldu gura dizuten ‘Etorkizun’ idea erosiz. Zure talentuak, ordean –beste haren parabola liluragarri hartan bezalaxe–, eskuartean eta eskura dituzunak dira (zu baitzara esku), barrenak agintzen dizunaren mende gara ditzazun disfrutatuz (noski, Don Bildur-ek belarrian xuxurlatuko dizu, mihi biperinoaz –bipera kastakoa baita–, gorde ditzazun, gainerakoan galduko dituzulakoan…).

   Doan eman zaizkit, disfrutatzeko eta, disfrutatuaren disfrutatuaz, hazi daitezen, nere ingurukoek ere dasta ditzaten frutu goxoak, bizitze fruktuos honi dariona gozatuz.

   Antzinako –baina oso-oso presenteko– esaldia parafraseatuz, zera generrake: KRISIA DOAN EMANDAKO OPARI OPAROZ GAINEZKAKO PRESENTEKO EBAKIA DA.