Hockney

Hala ere, gehien harritu zintuena, korridore baten amaieran ikusitako koadro bat izan zen. Hura, edo, behinik behin, haren oso antzekoak ikusiak zenituen katalogoetan. David Hockney-ren aspaldiko piszinetako bat zen, eta bat-batean otu zitzaizun oraindik ez zeniola neurri egokia hartu Joaquin Aldazi. Hockneyren lanak baldin bazituen etxean, bazitekeela zeu baino gazteagoa izatea gizon zahar hura.

Koadroa atsegin zitzaizula esan zenionean, beste bi lan txikiago ere bazituela erantzun zion, tartean autorretratu bat, gazte zenekoa. Erakutsiko zizkizula geroago, bere logelan zintzilikatuta. Egia esan behar bazuen, Hockneyren lanak asebetetzen zuela denen artetik gehien, baina, zoritxarrez, garestiegiak zirela berarentzat.

Hasier Etxeberria, Mutuaren hitzak. Susa narratiba, 2005. 134 or.

                                         Self-portrait

 David Hockney (Bradford, 1937), pintore britainiarra. Autobiografikotzat jotzen dira haren artelanak. Lagun hurkoak,  maitaleak, sendikoak, eta bere objektu kutunak pintatu ohi ditu. Paisaia eguzkitsuak, igerilekuak eta igerilariak, palmondoak eta artez jagondako zelaiak ere gai izan ditu sarri.  

     A bigger Splash. 1967; Acrylic on canvas, 242.5 x 243.9 cm

A Bigger Splash margoa Californian pintatu zuen, 1967ko udan. Egun bero, oskarbi baten irudikapena da. Argiaren indarrak eta itzalen aztarnek eguerdia-edo dela iradokitzen dute. “Zipriztinak pintzel eta trazu txikiz osatu nituen; bi aste eman nituen haiek margotzeko. Asmoa garbia nuen, Leonardoren modura pintatzea, ura gaitzat izan zituen margoak imitatzea, haren zurrunbiloak sortzea. Eta are gogokoago izan nuen bi segundoz dirauen eszena bi astean zehar lantzea”.

 "Igerilekuak pintatzean kezka izan dut ura nola margotu. Benetan arazo interesgarria da urarena, bai gaitzat hartuta, bai berau adierazteko eta deskribatzeko egin beharreko lana dela kausa. Ura edozer gauza izan ahal da, edozein koloretakoa, aldagarria da beti, ezin da zehatz definitu”. David Hockney by David Hockney liburutik hartua (1976).