Famili bertso-eskola martxan

Gaur hasi gara gure esperimentu berriarekin.  6 ume eta 6 heldu bildu gara, irakasle banarekin. nahiz ta batzuk apur bat txoratu eta besteak hasieran lotsatu, itxura polita du honek. Haurrak euskaraz jolasean, marrazten eta bideo polit bat ikusten egon dira, eta oso gustora gainera. Bien bitartean, hara helduok ze sorta txukuna egin dugun!  

Aurtengo bertso-eskolak

a ze enkantua!

Kiloka beharko da

pazientzi santua...

Lehen saioa da ta

hasi da kontua

lapiko berean da

esperimentua

 

Gaurko eguna dugu

beteta gogoa

bertsotan hasi gara

hau giro beroa

Unairekin umeak

mutila, goxoa...

elkarrekin lanean

famili osoa

 

Elkartzeko eguna

dugu berriz ere

Oihane bertan dugu

botere ta lege

hementxe gaude denok

pozik halafede

Ez dut ikusi eta

non ote da Jere?

 

Hasi gara bertsotan

gu dagoeneko

leku polit honetan

benetan ederto

hona etorri gara

hizkuntza lantzeko

ta ikasi ondoren

ondo pasatzeko!

 (batzuen lehenengo eguna zela kontuan hartuta ez dugu meritu makala eh?)

Hurrengo hitzordua. Azaroaren 7a, 18:00etan AEKn. Ateak zabalik edukiko ditugu animatu nahi dutenentzat.