Firefox eta ni

Egunon lagunak!

Gaur pil-pilean dagoen gai batekin nator, Firefox edo Internet Explorer?
Nik betidanik izan dut ordenagailuan Explorer, beraz, ez dut debate hau buruan izan inoiz. Hala ere, gauzak aurrera doaz eta Arrasatera heldu nintzen egun berean Firefox-en berri izan nuen. Neska batek Firefox erabiltzeko gomendatu zidan, neska hau informatika ikasten ari da. Eta hor hasi ziren nire zalantzak. Zein izango da hobea?


Hurrengo egunean unibertsitateko ordenagailuetan sartu eta bertan ikusi nuen lehenengo aldiz Firefox. Nahiko kuxkuxeroa naizenez, Explorer alde batera utzi eta Firefoxen sartu nintzen.

Arreta deitu zidan lehenengo gauza hizkuntza izan zen. Euskaraz zegoen. Interneten nabigatzen hasi nintzen eta fitxen sistema ikusi eta erabili nuen. Oso erabilgarria dela uste dut, izan ere, hogei web ezberdinetan egoteko aukera dut eta oso modu erosoan mugitu naiteke batetik bestera.

Nahiz eta unibertsitatean Firefox erabiltzen nuen etxera edota erresidentzira heltzerakoan Explorer erabiltzen nuen. Atzo Web 2.0ko klasean gure maisuak Internetetik Firefox lortzeko aukera geneukala esan zigun eta atzo bertan nire ordenagailuan instalatu nuen. Momentu honetan Firefox erabiltzen ari naiz. Nire istorioa Firefoxekin atzo hasi zen eta denbora dezente elkarrekin egongo garela uste dut.

Besterik gabe!
Ondo segi!