Pentsamenduen pisuaz

Pentsamenduen pisuaz (Gabonetako Sermoia)

John Bargh eta New Yorkeko Unibertsitateko beste irakasle batzuek ikerketa [PDF] burutu zuten Journal of Personality and Social Psycology aldizkarirako. Parte hartu zuten pertsonei hitz desordenatu batzuk erabiliz esaldi koherenteak egiteko eskatu zitzaien. Parte hartzaileen erdiei zahartzaroarekin erlazionatutako hitzak eman zizkieten esaldietan, adibidez: "azala, zegoen, gizonaren, zimurtuta". Beste erdiei esaldi berberak eman zizkieten baina zahartzaroarekin zerikusia zuen hitza aldatuta, esaterako: "azala, zegoen, gizonaren, leun". Parte hartzaileek kontu handiz eraiki zituzten esaldiak eta amaitu zutenean eskerrak eman zizkieten ikerketan parte hartu izanagatik eta igogailuetara joateko esan zitzaien. Parte hartzaileek ikerketa amaituta zegoela uste zuten baina benetako esperimentua orduantxe hasiko zen. Pasabidean ikertzaile bat zegoen ezkutatuta eta, kronometro bat eskuan, neurtu egiten zuen parte hartzaile bakoitzak ikerketa-gelatik igogailuetara joateko behar zuen denbora. Ondorioa harrigarria izan zen: zahartzaroarekin zerikusia zuten hitzak erabili zituztenek besteek baino denbora gehiago behar izan zuten igogailuetaraino heltzeko; astiroago ibili ziren. Konturatu ere egin gabe, zahartzaroan pentsatze hutsarekin, zahartu egin ziren; atso-agureak bezala hasi ziren ibiltzen, pentsatu zutenaren pisuak abailduta.

Honen guztiaren ondorioa, lagunok, ezin da beste bat izan: Datorren 2009 honetan saia zaitezte baikor izaten, baikor pentsatzen; ez zaitzatela beltzak gainditu, ez zaitzatela ilunak eraman.

Hitz bitan, pilosopoak dioenez: Ondo pasatzeko jaio ginen! Edo beste pilosopo haiek ziotenez: Inguruan ditugun neska-mutil pila / muermoa beheraka eta goraka zakila!

Amen.

Sorry Onak
eta
Urte Very ON!