Euskal blogaria izatearen lau abantaila

                        Lehen abantaila: Zure egoa ez dago arriskuan. Esan egiten da, eta agian arrazoi pitin batez, ez dagoela blogari baten egoa baino gauza handiagorik. Ez duzu arriskurik euskal blogaria bazara. Digg-en jendearen 3.000 botu lor ditzakezu egun bakar batean eta 8.000 astean; meneame-n 800 aldiz astindu lezakete irakurleek zure mezua; gure zabaldu-n, ordea, 40 zabaltze arrakastatzat jo dezakezu, eta berrogei irakurleren aldeko bozka txakurraren eztula ez bada ere, ez da –ados egongo zarete- inoren egoa neurrigabe puzteko modukoa.

                        Bigarren abantaila: Astean ez bada, hamabostean behin aurkituko duzu Euzkal Errian Euzkaras-erako moduko argazkiren bat. Eta eskura ez baduzu, hartu telefonoa eta irten kalera: klik! Gero, mezua apur bat jantzi: euskararen aurkako eraso barkaezina, lotsagarria... eta baduzu aste honetako post-a. Honekin hurrengo astera arte iraun dezakezu; aste horretan egongo da euskal blogosferian -zoritxarrez- injustiziaren baten aurreko jarrera irmoa agertzeko deia: free-ezdakitzer edo notimefor-badakitnor-ren bat eta -voilà!- bigarren mezua ere dohainik atera zaizu, neuronarik batere gastatu gabe: pagotxa! Adi bazaude, astean behin elika dezakezu bloga honela.

                        Hirugarrena: Ez dago trollik, ez bada –eta oso maila apalean- Sustatun edo zenbait blogari “labeldun”en (*) blogetan.

                        Laugarrena: Erantzunen kalitatea. Benitok dioen moduan blogari guztiok negar egiten dugu (ezkutuan eta bakarka, hori bai) erantzunik ez daukagunean. Laster ohitzen gara baina, euskal blogosferan lurkerrak baitira nagusi; erantzun gutxi, oso gutxi. Dena dela horrela nahiago, ikusi besterik ez dago espainolezko blogetan nagusitzen den erantzun mota: muy buen post, genial!, vaya peazo de blog el tuyo, desde hoy lo visitaré siempre, tio... eta horrela. Erantzunen kalitatea askoz maila gorenekoa da euskal blogetan, berton erraz frogatu dezakezuenez ;-)

Hainbeste abantaila eta gero, ez dakidana da zeri itxaroten ari zaren bloga zabaltzeko... (**)

(*) Ez, ez eta ez; ez dut izenik emango.

(**) Oraindik ez baduzu.