Taxista maltzurrak edonon

Bangkokeko aireportuan nago taxia hartzeko ilaran. Nere txanda da, eta taxista irribarretsu bat etortzen da niregana. Hotelaren izena esaten diot, eta joko bat izango balitz bezala taxista irribarretsua eta biok abiatzen gara hotelera. Hori bai, motorea martxan jarri aurretik taximetroa jar dezala eskatzen diot. Tipoa penatuta aktibatzen du. Hala ere, handik gutxira irribarretsu jarraitzen du.
Zortea eduki omen dugu eta trafiko gutxi dago.  Bistak ez dira zoragarriak, errepidea eta alboko etxe batzuk eta mendebaldarren antza duten tailandiarrak agertzen diren iragarki erraldoiak.
Taximetroari begiratzen diot behin eta berriro, eta konturatzen naiz kontagailua ez dela aurreratzen. Bat-batean taxistak esaten dit hondatu egin dela, eta barre batzuk botatzen ditu berriro. Kaguen zotz kabroi honek ziria sartu didala pentsatzen dut. Orain regatzea tokatzen da. Orduan, Marokon ikasitako teknikak erabiliz prezio ona lortzen dut. Hotelera iritsi eta nire gauzak igotzen ditut nire gelara. Egiten dudan lehenengo gauza dutxa bat hartzea da, Bangkoken kriston hezetasuna dago eta.