Hillerod-Tisvildeleje-Gilleleje-Hillerod

 Frederiksborg gaztelutik abiatu gara. Goizean goiz ez dabil inor gazteluko jardinetan, lorezainak izan ezik, eta lasai-lasai dago dena. Hillerod herritik irten eta 32. ibilbidea jarraitu dugu. Gero, kostaldera iristean, 47. ibilbidetik joko dugu eta Gillelejetik itzultzean 33.etik. Ibilbide hauen mapak www.visitnordsjaelland.com helbidean lortu ditugu eta oso ondo daude ingurua ezagutzen ez dugunontzat. Ibilbidea jarraitzea erraza da seinale urdinez markatuta dagoelako.

Basoan zehar goaz hasieran eta gero aintzira bat inguratu dugu Helsinge herrira iritsi baino lehen. Haurreskola baten aurretik pasatu gara eta kanpoko jolas lekua deigarria iruditu zaigu, terreno asko daukalako.

Goizeko geldialdia egin asmoz kanpin bateraino iritsi gara eta bertan egin dugu hamaiketakoa, indarrak agortu baino lehen. Handik laster itsas bazterra,  Ràgelejen. Hondartzan harri asko dago eta aldatzeko txabolatxoak kuriosoak dira, Realzaleenak eta atletizaleenak dirudite. Azkarrago iritsiko ginela uste bagenuen  ere,  halako batean iritsi gara Gilleleje herrira. Sarreran, ia nahigabe, taberna polita aurkitu dugu itsas ertzean eta, itxura ona duenez, bertan gelditu gara bazkaltzen itsaoari begira. Leku lasaia eta ikusgarria  izateaz gain, ondo eta merke bazkaldu dugu.

Gero itsasoaren ertzetik herriko portura iritsi gara lorez eta berdez inguratutako bidea jarraituz.

Ez dabil jende asko, baina turismora bideratuta dago kostaldeko herritxo hau.

Ez dauka asko ikustekorik eta laster abiatu gara, 33. ibilbidea jarraituz, beti ere trenbidetik nahiko gertu, trena hartzeko premia ikusten badugu-edo. Herritik kanpo dago geltokia eta abisua eman behar da trena bertan gelditzeko. Hala Pakek trenez jarraitzea erabaki du eta Marum geltokian gelditu gara.

Nik aurrera egingo dut basoan barrena beste 16 Km. besterik ez dira gelditzen-eta. Basobidea oso polita da igoera eta jaitsiera batzuekin eta laster iritsi naiz herriko lakura. Guztira 70 Km. egin ditugu eta ibilbidea zoragarria izan da, lasaia, basoak eta itsas ertzak zeharkatuz.