Maitasun aitortza AED Lehiaketa

XXI. Literatur Lehiaketa - 1. SARIA

 

Doinua: Beti penetan, beti penetan......

Egilea: Xabi Igoa Eriz

1 Kaixo! Zer moduz? Ta behar zaitut

   hasieratik agurtu

   Ez dakit nola baina azkenik

   hontara naiz animatu

   Hainbeste gauza esateko ta

   hainbeste kontu ta datu

   Baina, zaila da eta ez ditut,

   hitz egokiak topatu

2 Nola esango ta adierazi

   eta nola azpimarra

   Nire ondoan ez zaudenean

   sentitzen dudan beharra

   Zuk eman didazu bizitzeko

   beharrezko den indarra

   Zu zarelako nire bihotza

   argitzen duen izarra

3 Nagoenean zure ondoan

   nahiz eta izan luzaro

   Denbora azkar pasatu ohi da

   zeren hain gustora nago...

   Zu gabe berriz orduak dira

   mila aldiz luzeago

   Eta nik mila muxu emango

   nizkizun, edo gehiago!

4 Jaso dituzu ta entzun ere

   hainbat kexa ta kritika

   Sufritu duzu, ikusi zaitut

   askotan horren etsita

   Negarrez hasi ta joan zara

   norabaitera korrika

   Baina jakizu nire sorbalda

   utz dezakezu bustita

5 Esan ohi dute koloreak daz

   gustuentzako eginik

   Ta hainbat eta hainbat gauzatan

   ez da falta epailerik

   Baina bihotzak, nireak behintzat,

   ez du inongo legerik

   Ta nahiz ta esan gura dutena

    zu maitatuko zaitut nik

6 Zu pozik bizi baldin bazara

   ni be egongo naiz alai

   Erantzun hauxe nahiz eta izan

   bai edo ez, ez edo bai

   Baina dut argi bat esperantzaz

   iluntasunaren etsai

   Eta horixe bukatu arte

   egongo naiz ni zure zai