Perzepzioen ezberdintasuna.

Euskal Herrian AHTaren inguruan 2006ko bigarren zati honetan sortu diren gertakizunak perspektiba zabal batetaz aztertu eta horrekin batera, proiektu hau kokatzen den kontestua argitzeko unea iritsi delakoan nago.

Urriaren 31an AHT Gelditu! Elkarlanak AHTren lanak Urbinako inguruan hasi zituztela prentsaurrekoan salatu zuenetik, proiektuaren aurkako adierazpenak, aldekoak, Itsasondoko herri kontsulta, Euskal Y webgunearen aurkezpena, Gasteizko manifa, Urbinako Erresistentzi gunea, oposizioaren kriminalizazioa... garrantzizkoak badira ere gatazka ulertzeko, muinean, "potaje" guzti hau demokraziaren kontzeptuaz dugun perzepzio ezberdintasunean datza.
Eta irakurlea bere burua lasaitzeko zera pentsa dezake: "Ni naiz zilegizko demokrata eta beraiek antidemokratak" Zientzia politikoan ez naiz aditua, baina horrek ez du esan nahi gauzak ikusten ez ditudanik eta gauza batzu ezin dira ezkutatu. Hortik aurrera irakurleak atera ditzala bere ondorioak.

Argumentazio hau azaltze aldera, herri kontsultak esanguratsuak dira, ikus dezagun bestela orain urte batzu Ormaiztegin gertatu zena: aurretik zegoen trenbidearen zubi zaharra bota edo bertan uzteko erabakitzeko herri kontsulta bat egin zen, mantentzea erabaki zuten ormaiztegiarrek eta erabakia bete egin zen. Goierritarra aldizkariak 311. alean Arantxa Tapia, Eusko Jaurlaritzako Garraio Sailburuordeari eginiko elkarrizketan Itsasondoko herri kontsultaz zera zioen: "...Legitimoa izan daiteke horrelako ekimen bat erabiltzea propaganda edo borroka ekintza bezala, baina hori ez da kontsulta bat" Herri kontsulta bat "propaganda" da? Itsasondoko kontsultan bozkatu zuten 232 herritarrek ez dut uste hori pentsatu zutenik bozkatzera joan zirenean.
Irailean Gasteizko Legebiltzarrean politika orokorreko eztabaidan, Juan Jose Ibarretxe Lehendakariak Euskal gatazka deitzen dena konpontze aldera udaletxeak Eudelen eskutik agente aktibo izango zirela esan zuen eta beraien partehartzea ezinbestekoa izango zela gatazkaren bideraketa eta konponketan. Lehendakariaren ekimena eskertzekoa eta baikorra izanik, nik zera galdetzen dut: Hor bakarrik? Komeni denean bakarrik? Gure egunerokotasuneko beste arloetan ez? eta Tokiko Agenda21ren barnean hartzen diren erabakiak? Demokraziaz dugun kontzeptuaren ezberdintasuna agerian geratzen da.

Horren arira, badira bi gertakizun konkretu oso esanguratsuak suertatu zaizkidanak hilabete hauetan eta susmagarriak oso:

Lehena, lanak inongo inaugurazio ofizial ekitaldirik gabe eta Urbina-Maltzaga autobideko desjabetzeak aprobetxatuz hasi dituztela, ohikoak diren argazki, "lehen harria", txistulari, aurresku eta antzekoak ez ditugu izan Urbina aldean. Kuriosoa.
Herri honentzako "ezinbestekoa" den proiektu bat gure klase politikoak gauez eta azpikeriaz hasi izana ikusten dudan lehen aldia da.
Bigarrena eta "heavya" oso, azaroaren 27an Eusko Jaurlaritzak Bilboko Euskaldunan yvasca.com "komunikazio kanal berria" webgunearen aurkezpenaren inguruan suertatu zen. Egun berean Vocento taldeko DiarioVasco eta Correo Españolek artikulu mamitsua zekarten non Batasunak AHTren aurkako oposizioa bereganatzeko "plana" duela azaltzen zuten.
Egun berean bi gauza horiek gertatzea ez zen kasualidadea izan, ondo baino hobeto pentsatutako mugimendua izan zen. Haratago noa: AHTren oposizio anitzaren kriminalizazio saiakera garbi bat izan zen. Hori horrela izanda, zeren zain daude AHT Gelditu! Elkarlana 18/98 sumarioan sartzeko? Koherenteak izan daitezela ta eraman dezatela AHTren oposizioa epaileen aurrera behingoz.
Ezker Abertzalearen aportazioa AHTren aurkako oposizioan beharrezkoa eta garrantzitsua izanik, (bakoitzari berea, ezkurraren legea) oposizio hau tresna politiko bezala erabiltzeko tentazioa Ezker Abertzaleak izatea zilegi eta posible da, hain inuxentea ere ez naiz eta aurrekariak hemeroteketan daude, ikus bestela Leitzarango autobidearen edo intsumisio mugimenduaren kontrol saiakerak. Baina AHTren aurka eta Ezker Abertzaleko kide ez garenon herritar anitzen erronka hor dago: Ezker Abertzalea gure alboan izan edo ez, euskal gizarteari Abiadura Handiko Trena zentzugabekeri bat dela azaltzea.

Alegia, AHTaren oposizioan "los de siempre" gaudela entzuteaz aspertuta nagoelako parte hartzen dut Goierriko AHT Gelditu! Elkarlanean. Hurbildu eta ezagutu eiguzu.

Xabier Eskisabel (Beasain)