GAY-LESBO-TRANS ZINE JAIALDI INTERNAZIONALA OSPATUKO DA BILBON

Bilboko Zinegoak zine-jaialdiak bost urte betetzen ditu aurten. Apirilaren 21-27 bitartean ospatuko da eta 65 film aurkeztuko dira bertan. Jose Maria Pou aktore katalana izango da aurtengo saritua.

2003.urtean jaio zen jaialdia eta egun, Europako erreferentzia bilakatu da gay-lesbo trans-en inguruan egiten diren ekintzen artean. Lehengo urteko pelikula kopuru bikoitza aurkeztuko dira eta Rainer Werner Fassbinder zuzendari alemaniarrari omenaldia eskainiko zaio.

Hilaren 21ean emango zaio hasiera jaialdiari Arriaga antzokian Santi Ugalde eta Maribel Salas aktoreen eskutik  eta Eduardo Gaviña transformistaren kolaborazioarekin. 91 izango dira proiektatuko diren lanak, horietatik  hirurogeita bostek atal ofizialean lehiatuko dutelarik. Laburmetrai eta dokumentalak izango dira; 13 dokumental eta gainontzekoak kortoak. Bilbo osoko areto ezberdinetan proiektatuko dira lanak; Arriaga antzokian, Kapitol zinemetan, Bilborock aretoan eta baita FNAC dendan ere. Hilaren 28tik aurrera, jaialdia amaitutakoan Bizkaia eta Gipuzkoan zehar proiektatuko dira filmik hoberenak.

Honetaz gain, lehian ez dauden beste 12 lan ere ikusgai izango dira jaialdiak irauten duen astean. “OFF zinegoak” , “ 25 años sin Fasbbinder” Rainer Werner Fassbinder zuzendari alemaniarraren omenez, eta “Argentina en corto”-ko 8 laburmetrai, Argentinako gay kolektiboaren ingurukoak. Horietako 3 lan  euskal zuzendarienak dira: José Julián Bakedanoren «La carta del amigo»; Mikel Ruedaren «Present Perfect»; eta Eduardo Gaviñaren «Yogurinha Borova abduced by Mika», azken hori lehiaketaz kanpo.

Aurtengo ohorezko saria Jose Maria Pou aktore katalanari emango zaio, eta jaialdiak irauten duen egunetan hainbat aktore eta zuzendariren bisita jasoko du Bilboko hiriak.