Txapela, Gasteiztik Agurainera
OIHANE PEREAK JANTZI DU TXAPELA ARABAKO BERTSOLARI TXAPELKETAN
Oihane Perea aguraindarrak 609,5 eskuratu ditu eta Asier Otamendik 588punturekin lortu du bigarren postua. Bi hauek arituko dira udazkenean hasiko den Eukal Herriko Txapelketa Nagusian.
Arratsaldeko bostetarako Printzipal Antzokia jendez lepo zegoen. Pankartak nonahi, eta giroa gori. Lehia parekatua aurreikusten zen baina sorpresak ere izan du lekua: aurten inoiz baino arabar gehiagok jarraitu dute txapelketa kanporaketatik finalera arte. Idoia Beitiaren agindupean aritu ziren hurrenez hurren Ricardo Gonzalez de Durana, Asier OTamendi, Oihane Perea, Iñaki Viñaspre, Manex Agirre eta Juan Mari Juaristi. Saio borobila burutu zuten guztiek, inoiz baino freskotasun handiagoarekin .
Zortziko handian Oihane Perea eta Iñaki Viñaspre bikote baten azalean jarri zituzten.Ume baten esperoan bost izango zituztela esan berri zien medikuak.Pereak honela ekin zion: <<baina bost ume ta bi bular, hori posible ote da?/norabaitera joan beharko dugu donante bat eskatzera>>. Viñasprek berriz honela erantzun zion: <<argi esango dizut oihane zuk ulertzeko bezela/gaurtik aurrera etxe honetan sei ume izango garela>>. Rikardo eta Asier bi arrantzale jubilatu berriren azalean jarri zituzten eta Manex eta Juanmari ospitaleko haurrei irri bat atera asmoz joandako pailazoetan.
Zortziko txikian saio polita osatu zuten Asier eta Oihanek. Asier Oihaneren eskulturako ikaslea zen eta irakaslearen erakusketa bat ikusten ari zenean bere lan bat aurkitu zuen. Juan Mari eta Rikardo hondartzara elkarrekin joandako bi lagun bilakatu ziren eta, azkenik, Iñaki eta Manex, aita semeen paperean jarri zituzten. Manex semea, tatuaje batekin etxeratu berria zen.Hona Iñakiren aurreneko bertsoa: “Gogorra da bai baina hau ez dugu drama/Ume txiki hau hezitzen hartu dugun lana/damutu behar zaizu Ai manex laztana/Ipurdian pailazo bat egin izana”. Manexen erantzuna ordea, tamainakoa izan zen: “Hiru bronka boteak gaur dizkit segido/ tatuaia kentzeko behin eta berriro/Zuk esan mekauendios bolumena igo/Nik logikoki ez dizut kasurik egingo”.
Puntuari erantzunean bertsozaleari eskainitako ale dotoreak josi zituen aurtengo txapeldunak:
BERTSOAREN MUNDUAN
SARTZEN GARENEAN
Hainbeste jende dugu
Gure oroimenean
Gaur ia zazpirehun
Igota trenean
Mila izango gara
Etorkizunean
Txapeldunordea fin ibili zen hamarreko txikian Manex Agirre aramaioarrarekin ofizioa txukun osatuz. Gaiak hala zioen, Asier ejerzitora derrigortuta joan zen, eta Manex semeak borondatez ejerzitoan izena eman nahi duela adierazi zion.
ASIER
Inbidia eman nizun
Gainera egitan
Ezkutatzeko asmoa
Izan dut sarritan
Ze gaizki pasa nuen
Garai aspalditan
Hori ikusiz disdira
Daukazu begitan
Jantzi zenezakeen
Baina inauteritan
MANEX
JA JA inauteritan
Ba nik ez dut uste
Etxean pasa ditut
Hamaikatxo urte
Diodana serio
Hartu behar zenuke
Fusila ta bandera
Musukatzean truke
Zu bezela gizon bat
Izan nahiko nuke
ASIER
Izan zaitez ba gizon
Har zazu tamaina
Eta etxetik urrun
Zoaz alajaina
Igual afganistanen
Zuk egin azaña
Jarri trajea eta
Esan bibaespaña
Baina oroitu etxean
Ni naiz kapitaina
MANEX
Hau kapitain pilotu
Ohorez bustia
Bere menpe daukana
Gaur etxe guztia
Militarra izan nahi dut
Dut erabakia
Sobran daude hainbeste
Broma ta aitzakia
Gainera ondo datorkit
Kolore kakia
Bakarkako lana erregular joan zen. Denek utzi zuten ale gogoangarriren bat, baina bigarren fasera ihes egiteko txartela bik soilik lortu zuten: Asier Otamendi eta Oihane Pereak.
Bigarren fasean beraz, seiko motzean aritu ziren hamabost urteko bi gazteren azaletik. Elkarri askotan begiratu baina sekula hitz egin gabeak zirela eta, Oihane Asierri hitzegitera hurbildu zitzaion. Saio umoretsu eta bizia egin zuten biek. Lehia estua zegoen eta bakarkakoan erabaki zen txapelduna. Gaiak hala zioen:Egunkariko notizia hori behin eta berriro irakurri duzu. Oraindik ez duzu guztiz sinetsi.Otamendik egindako ustekabeko potoak amaierako puntuazioan eragin zion. Hala eta guztiz ere, maisutasuna erakutsiz Iruña Veleiako aurkikuntzaren pare jarri zuen arabako txapelaren aurkikuntza berria. Oihane Pereak aldiz, emakumearen zapalkuntza izan zuen aldarri:
Martxoak 28,
Ta egunkarian barrena
Titular triste bat dago
Guztiz hunkitu nauena
Norbaitek gaur aurkitu du
Bere bidearen azkena
Emakume izatearren
Hori da gure kondena
Bakarren batek barruan
Eduki arren problema
Guztiak sentitu ditut
Mina, amorrua ta pena
Egunero gertatzen da
Holako hainbat istori
Gizontasunak ez dauka
Antza hainbat kategori
Behin eta berriro gara
Zulo berean erori
Eta gure askatasuna
Galtzear edo galzori
Genero indarkeria
Bakar bakarrik da hori
Harropuzkeri galanta
Maitasunaren hilobi.
Ta gasteizen gertatu da
Hemen bertan halafede
Batzuek pentsatzen dute
Direla etxeko errege
Eta alper alperrik dira
Polizia eta lege
Bilakatu nahi gaituzte
Haien panpin ta titere
Aholkutxo bat badaukat
Ta egin nahi nuke nere
Ez dezagu permititu
Hitz zakar bakar bat ere
ARABAKO BERTSOLARI TXAPELKETA 2009
Gasteiz (Finala)
BERTSOLARIAK
|
Gasteiz 2009-04-04 Printzipal Antzokian 17:00 GAI-JARTZAILEAK Idoia Beitia AURKEZLEAK Rakel Anitua |
Honenbestez sustraiak errotuz kimuak loratu dira.Arabako bertsolari txapelketak datorren urtean ere izango du zer esan eta emana.
ARABAKO BERTSOZALE ELKARTEA
Iruzkinak
Utzi iruzkina: