Esteban Garibai historialariaren sortetxea
Ekaitz Santazilia, CC BY 4.0, via Wikimedia Commons.
Ustez Arrasateko etxe honetan sortu zen Esteban de Garibay y Zamalloa (Arrasate, 1533/03/09 - Madril, 1599/1600?).
Familia onekoa, gaztetan Gasteizen eta Oñatin ikasi zuen eta gudarostean ibili zen. Arrasateko alkate ere izan zen. 1571an Los cuarenta libros del Compendio historial de las Chronicas y universal historia de todos reynos de España lana argitaratu zuen Flandesen eta beranduago, Felipe II.a Espainiako erregearentzat hainbat lan egin ondoren, 1592an erregeak kronista izendatu zuen. Zenbait liburu kaleratu zituen baina “Grandezas de españa” lan mardulak oraindik osorik argitaratu gabe dirau.
Euskararen munduari begira, hain zuzen ere “Grandezas de España” horren barruan datozen memorietan Garibaik dio bi euskal errefrau bilduma egin zituela. Originalak galdu badira ere, Espainiako Biblioteka Nazionalean kopia bat gordetzen da. Errefrauak beranduago argitaratu dira eta badira egiletasunaren gaineko dudak.
Bestalde, bere kroniketan euskarazko eresiak ere tartekatu zituen, halanola, Milia Lasturkorena, Martin Bañezena edo Olasoko kanta.
Ekaitz Santazilia, CC BY 4.0, via Wikimedia Commons.
Etxea Arrasateko harresietatik at dago, errebalean hain zuzen. Lehen Beheko errebalaren 13.a zena, egun Biteri etorbidea 5 da. Eraikina, erabat berritua, Gazte Bulegoaren egoitza da gaur eta inguruko etxeak eraitsita, eraikin modernoago bati atxikia ageri zaigu. Inoiz oroigarririk izan badu ere, gaur egun galdua du.
Informazio gehiago:
Iruzkinak
Utzi iruzkina: