Nongoak garen

Pete -ahoska bedi Piri- duela 33 urte etorri zen New Jerseytik Euskal Herrira, bere aititeren sorlekua eta familia ezagutzera. Hemeretzi urte bizartsu eta beltzaran zituen eta udako hiru hilabeteak eman zituen hemen. Familiako lehengusu-lehengusinekin ibili zen uda osoan jairik jai eta hondartzaz hondartza. Aurten etorri da, ordutik lehenengoz, eta bazkari batean esaten zidan hemen egon zen uda hartan asko ikasi zuela norberaren identitateaz.

Pentsatuko duzue 1979 urtean, politika gori-gori zegoelarik, lehengusuek-eta sekulako txapa emango ziotela euskaldunon nortasunaz eta gure askatasun nahiaz eta gatazkaz eta abar eta abar... Bueno, hori ere bai, baina Petek beste zerbait kontatu zidan: -Begira "primo" -esan zidan- Estatu Batuetan mundu guztia da beste leku batekoa, arbasoen arabera: irlandarrak, italiarrak, grekoak... Eta ni ere halakoa nintzen neure inguruan: aitaren aldetik, odol euskalduna eta Portugalen muga ondoko Extremadurakoa; amaren aldetik, italiarra... Horixe nintzen ni hemeretzi urterekin New Jerseyko lagunartean. Baina hara! Euskal Herrian amerikanoa nintzen, estatubatuarra, gringo-a, horixe besterik ez! Orduantxe jakin nuen zer nintzen eta halaxe itzuli nintzen etxera: amerikano soil bihurtuta, zer eta nongoa nintzen jakinda.