Egonarria

Gerran ari dira, borroka eternalean esan genezake modu poetikoagoan baina ez da hainbesterako; eternitatea baino askoz gutxiago da: milaka milioi urte baino ez daramatzate gerran bata bestearen inguruan. Ehun milioi urte bakoitzeko elkartu egiten dira eta batailan elkarri zartako ederrak ematen dizkiote zauri erraldoiak eraginez. M81-ek besoak sendotu ditu baina M82-ren barnean gas hodei ikaragarriak garretan daude, X izpi iturriak sortzeraino bero. Ehun milioi urte bakoitzeko bataila bat, beste bataila bat, harik eta zenbait mila milioi urte barru bien arteko materiaz osatutako galaxia bakarra geratuko den arte.

P.S.: Zalantzan ibili naiz testuaren azkenean ondokoa ipini ez ipini. Ezin izan dut erabaki eta azkenean idatzi osteko honetan uztea pentsatu:

"Ikasiko ote dugu zerbait ala jo ta ke irabazi arte-ka ibiliko gara gu ere in saecula saeculorum?."