musikak badu zerbait...

    Zuzenean, beti ere musikak pertsonengan izan duen zirrara edo erraietara iristeko gaitasuna, zuzenekoetan izaten da, modurik zuzenena ("zuzenena?"). Musikariak hots, erritmo eta doinuak igorri eta entzuleak jasotzen ditueneko momentuak, hunkitzeko ahalmena duten noten  segida edota isiluneak... Komunikazioa, gizakiok hitzen bidez adierazi ezin dugun alde sakon horretara iristeko ahalmena du musikak, joera, estilo, etiketa edota garai ezberdinei arreta berezirik erreparatu gabe, zuzenean lortzen den
komunikazioa, atmosfera efimeroa musikari eta entzulearen artean: tabernetako kontzertuetan, futbol estadioetan edota lagunarteko afarian inprobisatutako kantaldietan, " Musikak badu zerbait zuzenean ". Herri eta kultura guztietan dagoen hori, musika, batzutan harmonikoki konplexuagoa, bestetan monotonoa, erritmikoa, herrikoia, "elitista", erlijiosoa, ateoa, politikoa, "apolitikoa", dibertigarria, tristea, hiletetan, diskotekan edota sehaska kantuetan, mp3, CD, K7 edota I POD-ean, herriko festetan plaza taldeak jotako bertsioan, FIB-n edota gaztetxean, amamak iloba lotarazteko, belarrira ahots urratuarekin xuxurlatzerakoan, umeek kalean jolasterakoan, irrati uhinen bidez entzuten dugun hori, musika...

    Zerk dauka musikak? Zergatik hotsen konbinaketa matematikoak hunkitzen gaitu? Matematikak zehatzegiak dira erraiak  iraulitzeko.  Aldi berean, kanta bera, musikari ezberdinen ahotan ez da berdin ailegatzen. Batzuk  barrenak nahasteko "zera " hori dute, artistak dira,  zuzenean taularatzen diren aldioro  "dena ematen dute",  Blues-aren hastapenetan ibilitako haiek zioten moduan: "Txanda hartu eta eskenatokira igotzean zorrak kitatu". "Biluztu" diote beste batzuk. Arima stripper-ak ote?... enfin, musika, zuzenekoak eta beste zenbait bizio...