Errauste planta inposatzeko egin dituzten mugimenduak

Koldo Aldabek BERRIAko bere zutabean, Hondakin izenburupean, errausketazaleen erasoen inguruan dihardu gaur. Hitzez hitz honela dio:

Hondakin

Zarama aberastasuna da; galdetu, bestela, Italiako mafiari. Zarama aberastasuna da; begira Alacanten lehertu den ustelkeria kasuari. Zaramari kiratsa dario, eta zarama politikari zer esanik ez.

Hondakinak kudeatzeko bi eredu lehian dira Gipuzkoan. Baina lehia hori ez da berdinen artekoa, ez indarrez, ezta estrategiaz ere.

Batzuek euren aukera eraginkorra dela, emaitza onekoa eta sekula ezagutu ez diren birziklatze mailak lortu dituela frogatu dute; besteek, berriz, elkar hartu dute lehian duten eredua birrintzeko; San Marko mankomunitatean orain arteko indar oreka hausteko eta errauste planta inposatzeko egin dituzten mugimenduak hor dira.

Atez ateko zabor bilketa indartzen ari da, ordea. Ez soilik Usurbilen, Hernanin eta Oiartzunen. Debagoienean ere erabaki bera hartu dute. Eredua hedatzeko bideak ere badu horretan eraginik.